ولليوم الثانى ع التوالى , بتكلم فى نقطة سقوطى بكل منظور ممكن يتعدى عليه , الفكرة إنك ما بتقدرش تلاقى حل للموضوع دا علشان مشكلتى تتلخص كلها فى أهلى , كونى مش بقدر أعمل حاجه ولا أنفذ شئ عايزة غير وبيقابل الموضوع رفض تام وهرى كتير كبير ملخص النقطة كلها إنك ساقط.


فكرة إنك مش بتستحمل هزار أى حد على الموضوع بس ما ينفعش تقول كدا عشان إنت شخص سخيف وما بتتكلمش عن نفسك ولا بتعرف تتكلم مع حد مهما كان مدى الحكايات والحاجات اللى بيثق فيك وبيحكيها ليك .


مشكلة إنك لما تقرر تغصب على نفسك وتحكى للأشخاص دى جزء من المشكلة وفى الآخر يرزعوا رد سخيف من غير قصد يحرق دمك ويعلى ضغطك وتفضل لمدة أيام مش بتعرف تعمل حاجه بسبب خنقتك من مدى الإنحدار الدراسى اللى وصلت ليه .


فكرة إنك مذلول عشان تعمل اللى نفسك فيه ومش عارف تعمله بنفس بسبب نقطة إنك بتُطارد من فكرة إنك ساقط أو فاشل أو مش نافع ولا هتنفع دى ذات نفسها بتخليك تفقد القدرة والرغبه فى إنك تكمل فى الشئ اللى إنت حاطط راسك فيه وعايز تخلصه وتخلص منه متأكد إن كتير إتقاله إعمل اللى بتحبه جنب القرف دا , بس لما إنت مش عارف يكون مصدر لإنك تعمل اللى بتحبه دى ساعتها بيعملوا إيه ؟ يشتروا صبارة ويناموا تحتها فى الحفرة ؟


أنا مقتنع تماماً بكون المشكلة عبيطة جداً , وكون إن التعليم أصلاً فاشل فما بُنى على باطل فهو باطل . مقتنع إن الأهل مالهمش حل غير ربنا ياخدك من وشهم أو ربنا ياخدهم هم وساعتها إخواتك هيتكدروا وإنت اللى هتتحمل المشكلة دى .


إنك إجتماعى وصحابك كتير وكويس معاهم بس ما بتظهرش دا ليهم وبالتالى هم بيحسوا إنهم one way وإنت صامت مش بتتكلم عن نفسك بس مجرد سفنجة بتمتص مشاكلهم وتتعصر تنزل ليهم حل أو شوية طبطبه بس دى بتخسرك ناس كتيرة , فى الواقع كنت بقول يولعوا ومازلت ما بتغيرش عشان حد بس إكتشفت إنى خسرت كتير , جداً


أنا مش هتلاقونى بعرف أعبر عن مدى إندماجى وسطكم ولا بقدر أبين معزة الناس عندى خالص , ماحدش يتضايق منى أبداً , دا أنا كائن لا يخرج أى مشاعر تخصه وعيل مكشر ورخم وسخيف كدا طول/أغلب الوقت . ولما حد بيقولى على إنه بيعزنى/بيحبنى أو بيشكر فيا مش بعرف أرد وبغير الموضوع


إنتهى البيان.

تعليقات

المشاركات الشائعة من هذه المدونة

في رثاء عزيزةٍ

كحبات الندى

Mania -1