تناقضات متناثرة

الرفاق بيتخرجوا. وجب أتكلم شويه عن الدفعه دى بشكل مفصل. أول شخص عرفته من الدفعه دى كان عبدالرحمن الشامى وأول معرفتى بيه كانت فى ميدان التحرير. كنت نازل أنا وأبوصيره (اللى واحشنى بغباء) بعد ال18 يوم ولقيناه هناك ، قعدوا يتكلموا عن إزاى شامى كان ضد النزول ونزل وكان فيه كم من اللطافه فى اليوم دا بينا ما إتكررش تانى غير يوم عيد ميلاده. مرت الأيام وحضرت أول مره نادى الكتاب وكان الإجتماع عن آلهة الإغريق ومحمد أسامه بيتكلم عن رواية الرجل الذى كان الخميس. من اليوم دا عرفت كذا حد. تطور الأمر لخروج مع الناس دى ، أول مره رحنا فيها بيكيا يوم ناسيه بالمره بس دى برضو من النقط المحوريه اللى عرفت فيها لفيف لطيف من الناس دى. وسفرية الأقصر وأسوان. نزول القهوه. علمونى طرنيب و estimation وأتشتم من ناس مجهولين بسبب إنى كنت ما بردش على التيليفون يوم الثلاثاء دا! .. نترمى أنا وأشرف فى وسط الغاز نطفى قنبلة الغاز ونطلع نسأل بعض إنت كويس وإحنا مش قادرين نتنفس ! محمد أوسامه : أول مره أذوق الكاب كيكس كانت معاه ، كُنا راجعين من قعدة صهلهله وقلنا نوصل آيه .. كانت أول مره من محل غير Nola  ، كانت مش سيئ