تناقضات متناثرة

رجاء شخصى ، الفترة اللى جايه فترة صعبه عليا شخصياً ، دا أول تيرم ليا فى الكليه أكون فيه بجد وشادد حيلى بشكل باسطنى شخصياً . ( وإن كان الOutput بتاعى سئ جداً وغير مرضى بس الحمدلله ) خليكم عون وما تبقوش عوامل حفازة للنكد والإحباط اكتر ما هى مريحة معايا ، خليكم مبهجين حتى وإن كنت أنا شخصياً ثقب إسود بيمتص كل البهجة المرسومة على حياتكم السعيده. حاول بعد الإمتحان ما تسألنيش ليه متضايق ، أنا هفضل متضايق لحد ما أتخرج ، تخيل معايا كدا علشان أتخرج بجيد بس أنا محتاج السنه دى واللى جاي ه أجيب جيد جداً واللى بعدها إمتياز -إن شاء الله- فلما أعك أقل عك دا بيخنقنى وبيضايقنى ، وما حدش يقولى بطل دلع علشان حرفياً دى كلمة بتحرق الدم أكتر من مالك أو إحكى فيك إيه . آخر طلب ، إدعولى أخلص الكليه دى أسرع من البرق لإنى تعبت منها وحاجه كمان عايز أتخرج قبل أختى عيب نتخرج سوا أو بعدها ، إدعولى أخرج بجيد علشان ما أتكدرش فى حياتى ما بعد الكليه والمقبول يفضل يطاردنى حتى القبر. (أنا مقتنع إن الدرجات مالهاش علاقه وكل حاجه بس نفسياً عايز أجيب تقدير علشان الواحد زهق من المجهود اللى بيتشفط فى أرجاء ا...

إنه فى هذا اليوم وبنفس هذا التوقيت بدأت قفل كل الحاجات القديمه اللى عندى على التايم لاين ، السبب غير معلوم لكن الأكيد منه إن الفعل دا يعمله شخص مريض نفسياً وغير متزن. ياريت نخلى بالنا من كلامنا مع الناس وما نقولش كلمة على قد ما هى هزار وفيها من السخف الكثير وبنقولها بهزار برضك ، خلوا بالكم يا بهايم. عادى جداً لما تنام 14 ساعة ما تخافش إنت مش مريض بالعكس إنت كويس . بطلوا تشربوا نسكافيه وإشربوا شاى أخضر الربيع ، بيهون كتير ومش مهم نفضل صاحيين كتير ، كدا كدا خربانه ومش جايبه همها. قررت مش هذاكر سيجنالز غير بكرة بالليل ، وقررت قشطه هى كدا كدا مش جايبه همها أنا هعدى فى المادة وطز فيا وفى اللى نفسى فيه . ربنا ياخدكم كلكم.