عنفوان إنقطاع

-
بمناسبة إنى مش قادر أنسى الموضوع دا,وبقاله فتره كبيرة جداً بيفلقنى .


 إزاى بنحكم على الناس إنها صغيره أو سنها لا يتجاوز كذا؟!! يعنى الشكل ولا الذقن ولا الشعر ولا كرمشة الوش ولا إيه بالظبط ؟ هل اللبس بيكبر السن فعلاً ؟ لما الواحد بيلبس قميص وبنطلون هل بيكون شكله اكبر من لما يكون لابس بنطلون جينز وتيشيرت ولا بيكون عيل خالص لما بيلبس شورت وتيشيرت سبعه ؟

موضوع السن دا بالنسبه للناس بيفرق جداً , يعنى مثلاً تلاقى حد بيعمل فعلٍ ما تلاقى ألف من يقوله إحترم سنك , هل السن بيحكم عليك تصرفات معينه !!! , ولد مازال بيشوف كارتون وهو عنده 30 سنه تلاقى صحابه يقولوله " ما كبرتش لسه؟" أو " عيب على سنك وشنبك اللى فى وشك"


المهم فى الآخر إنت بتتربط بالسن اللى ظاهر عليك , بتتربط بقواعد المجتمع بيحددهالك علشان تتحرك فيها, لما بتخرج عنها بتصنف تصنيفات لو إنت ضعيف الإراده والعزم هتبطل تعمل أى حاجه . بتنام ليه بالليل وتصحى الصبح ليه ؟ بتشتغل برا مجال تخصصك ليه؟ مالها هندسه يابنى ليه تقول عليها كدا حد طايل يدخلها ؟ إنت ليه مربى شعرك زى البنات ؟ ليه لابس تيشيرت واسع أوى كدا ؟ ليه بتجرى وتضحكى بصوت عالى ؟ ليه صحابك كلهم ولاد/بنات بس؟ عيب تسلمى على الولاد علشان .............. .



-------------

إرتباط المسيحين بالكنيسه , مالناش دعوه بالبواطن , نتكلم فى الظاهر . يعنى بتلاقى الكنيسه بتعمل نشاطات وتحركات بترفه عن الشباب وبتقوى علاقتهم ببعضهم , الأسر والتجمعات والمؤتمرات اللى بتحصل. بتحس بترابط نوعاً ما بينهم. على عكس الجامع , ومش هندخل فى تفاصيل أمن الدوله وتفاصيل إن ممنوع الجامع يعمل حاجه وإن الإخوان فشخوا أساس التحركات تحت إسم أى حاجه فى الفتره الأخيره.

------------

فى أول إصابتك بيكون الأدرينالين عالى وبيخفف من وجعك -دا اللى أعرفه فى الموضوع والله أعلم أكيد- بس بعد كدا بيروح الأدرينالين وبتحس بالوجع الحقيقى , إهو دا بقى الشعب المصرى عايش فى مرحلة الأدرينالين الكبيره دى وبيصحى على الوجع لما يخف شويه أو يختفى أثره من حياتهم . ماحدش بيحاول يتخلص من المرحله دى ويتأقلم مع الألم ويكمل بيه , الأغلب مبسوط بإنه متخدر . بس لما بيزيد المخدر بيموتوا من كتر القهر والكبت .


------------
 
كم من عملٍ به نأمل أن تموت , كم من معادلات علينا أن نفك طلامسها حتى نصل ؟ قُل لما الشقاء ؟
------------

تعليقات

إرسال تعليق

المشاركات الشائعة من هذه المدونة

في رثاء عزيزةٍ

-
إليك، بعد الكثير من التفكير والكثير من التردد، سأرثيك، لست أعلم أو أدري لماذا ولكنهم يقولون أن فاقد الشئ هو أفضل شخص يعطيه، ولأنني لم أنلك، سأرثيك. كنت السند والونس الذي لم أعترف بوجوده لأحد، كنت دوماً تنتظرين عودتي، لا تملكين شكلاً أو هيئةً، أنت فقط هناك عندما أعود من مشوارٍ طويلٍ احتاج فيه لمن يحتضن كل الهم والتعب. سافتقد كثيراً الأفكار التي تأتيني حينما أتعثر في زحمةٍ أو عندما يكون الكون كله ضدي وأنت فقط هناك، تجلسين في هدوء وصمت. المخلص دائماً وأبداً، أنا.
قراءة المزيد

Mania -1

-
 للأسف معنديش كلمة عربي توصف اللي بمر به، في نفس الوقت معنديش الطاقة أفكر بالفصحى، بالعكس عندي أفكار وأصوات كثيرة وكلهم بيصرخوا في نفس الوقت وكلهم عايزين يخرجوا. كانت الدكتورة بتتكلم معايا في أني محتاج أكون صداقات نسائية جديدة لأني محتاج رفيقة درب لأن الوحدة دي بتزيد من حالتي سوءً، حالياً عرفت كذا شخص جديد وبقى في أشخاص ثابتة في يومي بشكل صحي، هل ناوي أعترف بكوني محتاج لحاجة زي كدا آه، أنا معترف.
قراءة المزيد

نعكشه

-
 الحقيقة في كل الأمور هي أصعب شئ في المواجهة، بتقدر بكل سهوله تهرب وبتقدر بكل سهوله تعلق المشكلة على شماعة غيرك ولكن في الحقيقة جزء من النضج أنك بتواجه وبتقعد فترة كبيرة بتحاول تتعافى من الفكرة والمواجهة، بيكون شئ مؤلم جداً أنك تكون ضحية نفسك، ضحية اختياراتك وضحية تصرفاتك. هل هنا نقدر نقول أننا ضحية نفسنا؟ أعتقد محتاجين نعمم المصطلح ونعمم فكرة أنك مهما حاولت ها توصل لمرحلة من المراحل حياتك كلها متعلقة على لحظة الإدراك اللي هاتعرف فيها أنك خربت حياتك والخراب اللي أنت في دلوقتي ما هو إلا نتيجة اختياراتك. ـــــــــــــــــــــــــــــ بتعدي الأيام وبتعدي اللحظات المملة السخيفة أبطأ من أي وقت، الملل والزهق حاجة من الحاجات اللي بتخليني مستاء جداً، الخروج من البيت لو مش لحاجة مشجعة بفقد الرغبة في أني أكمل المشوار خصوصاً لو العربية مش معايا، بكون اللي هو ما فاكس كل حاجة وياللا بينا نلف ونرجع. الأغاني بقيت مملة، الشغل ممل وجحيم. بمناسبة الجحيم، أخيراً خدت هدية يوم ميلادي من لُبنى، الكوميديا الإلهية، الأناشيد فشيخة والرحلة اللي بيمر بها لحد ما يوصل للجنة ممتعه، مشكلتي مع الهوامش اللي فيها كثير
قراءة المزيد