جلسة سكيزوفرينية - الجزء الأول

* إنت عايز تعمل إيه أكتر من كدا فى نفسك ؟

لأ صدقنى أنا مش عارف أنا بعمل إيه وفين ، حرفياً تايه ولا مدرك لفين ولا لإمتى 

* طيب ليه مكتئب ؟

بطلنا الأسئله العبيطة دى ، أظن أغلب ما فى حياتنا هى مجرد شوية مكعبات صغيرة فى تكوين بيكئب البكتريا ويخليها تنتحر

* طيب ليه إنت حالياً بلمس ؟ أول ما بتيجى سيرة حاجة وتتعمق فى التفكير وتلاقى فرصك فى إنك تفلح ضعيفه بتكتئب ؟ أظن إحنا عارفين الحقيقة دى من زمان وماحدش هيجى يقولنا الكلام دا ، مجرد شئ من الحاجات اللى هتشوفها فى حياتك وهيجيلك يوم هتموت فيه

وهفضل عايش حزين كدا كتير ؟ طيب هفضل ما بقدرش أفضى اللى جوايا ؟ طيب مارينا سألتنى مالك وتوهت الموضوع كما العادة ، ما قلتش مالى بجد ! ما حدش هيعرف مالى غير لما أقول ، يعنى خايف من النتيجة عادى أقول ، متضايق من كل حاجه محيطة بيا وإيه الجديد ، مفروض انزل للعيال القهوة دلوقتى وفعلياً ماليش نفس أشوف حد منهم ، ليه أقعد كل دا فى الكلية ؟ طيب عارف إنك عايز تقول إن فيه حد من الناس اللى أنا مسكتهم دلوقتى مؤمن تماماً إن دا حاجه حلوة وكويسة جداً ليا ، بس فعلياً على أرض الواقع والمادة مفيش حاجه حلوة فى المدة اللى بتزيد دى .

* خلينا نكون واقعيين شوية مع حبة دراما ، تعرف أى حل للى إنت مطين نفسك فيه ولا مجرد عايم سايح فى دمك ومفيش حتى حتة شاش صغيرة أو بن تكتم بيها النزيف دا ؟

لا ، صحراء جرداء لا زرع بها ولا ماء

* قول ليا إنت نفسك فى إيه أو نفسك تحقق إيه على الأقل !!

مجرد عايز أخرج من الفقاعه اللعينة اللى أنا فيها ، أكمل فترة مبسوط منشكح لأى سبب عبيط ممكن يجى على بالك ، وما أكونش مستنى المصيبه اللى هترجعنى مليون خطوة واء عشان أندم إنى فرحت أو كنت على الأقل عادى ، محايد من غير أفورة.

* طب هل إنت مقتنع إنك هتبقى كدا فى يوم ؟ هل من الممكن توصل للنقطة اللى فعليا تكون ساكن صامت فيها وتقدر توصل للشئ اللى بتدور عليه ؟

فى حالة إنى خرجت من الففاعه ، بس الخروج دا لوحدى هيكون صعب ، محتاج حاجه تخرجنى ، كفاية كفاح فى سكة مش شايفها وحالياً البطارية خلصت خالص.

* طيب أنا زهقت المرة الجايه نكمل باقى الكلام دا ، حاول على الأقل تنسى النتيجة ، ركز فى التنس ، شوف الحلوة اللى عجباك كلمها اكتر وحاول توصل لإنها تكون شئ مسكن على الأقل الفترة دى عسى تفلح فى دا .