كل دا كان ليه؟ ..

خليك مع اللى



تصونك وتحافظ عليك بكل ما تملك وتحميك من كل حاجة ممكن تضايقك.

تقدرك و تقدر الحاجات اللى بتحبها و تفضل محافظة عليها.

تعرف تبسطك بأقل حاجة ، من غير تكاليف أو حتى مبالغة فى التعبير و الكلام ، مجرد حاجات بسيطة صغيرة.

تأسر كل ما تملك بمجرد إنها تكون موجودة.

تشوفها حلوة بكل ما فيها من تفاصيل سواء الجسدية أو الحسية.

تكون فى حضورها مفيش حاجة ثانية محتاجها جنب الوجود دا.

تحس بمعاناتك من غير ما تتكلم.

تحبك بكل الوحش اللى فيك وتكون متقبله دا منك، متحسش إنها جاية على نفسها عشان شايلة دا كله منك.

تخليك بتقول إن حياتك الفترة دى احلى من كل الفترات اللى عدت بالرغم من الحاجات اللى بتحصل والمواقف الصعبة اللى بتمروا
بيها.

تكون حاسس بمسؤولية فى وسط الحاجات اللى بينكم وتفكيرك ميكونش سطحى هرمونى بسيط.

تخليك تسافر وتروح وتيجى بمجرد ما تسرح فيها.

تخلى بالها من عينيك عشان هى بتعرف كل حاجة فيك من مجرد ما تبص عليهم.

تيجى تعيط ليك.

تكون ضعيفة معك وقصادك.

تستقوى بيك على كل حاجة وقصاد أى حد.

تضيف ليك.

تراعى ربنا فيك.

تيجى تpanic منك ليك قبل ما تpanic من أى حاجة.

بتقولك الحقيقة ومفيش بينكم كسوف من إنها تقولك إنها محتاجة تريح، أيوة هاتوجعك بس هى طاقة بتحتاج تتشحن.

_________

القرب من ربنا بيفرق كتير فى حياتك ويومك، يمكن الموضوع بيكون صعب خصوصاً بكم الأحداث اللى بنمر بيها وكم الظلم اللى بنحس بيه و إننا تعبنا. بس فى الأول وفى الآخر الحقيقة بتقول إن كل اللى أنت فيه دا حاجة من الحاجات اللى أنت تقدر تتتحملها و تقدر تعديها. بيكون كويس معانا وبيحط لينا ناس تسندنا وقت المشكلة بس أحياناً احنا بنرفض مساعدة حد عشان عاوزين نكون لوحدنا و عاوزين نكون جامدين و أقوياء ونمر و نعدى كل حاجة لوحدنا عشان احنا فشيخين و خلاص كل حاجة احنا نقدر عليها. بس بنيجى فى وسط المشوار بنلاقى إننا خلاص بنقول " وبعدين " ؟ أنا مفينيش حيل لكل دا ولا قادر استحمل كل دا ! ليه يا رب كدا ؟!!.

_________

أما يكون عندك اخبار حلوة وسعيدة كعلاقة بينك وبين حد الموضوع أما بينتشر مبيكونش حلو عشان البدايات فى الأول بتكون محتاجة تركيز، الكتمان فى مثل هذه الأوقات بيكون حلو، محدش هيكون مهتم بيكم قدكم. أنتم محتاجين كل الطاقة عشان تقدروا تتوصلوا للنقطة اللى بينكم اللى هتساعدكم قدام. حاول تنبسطوا بيكم قبل ما حد ينبسط بيكم. يوم ما تفرح حد بيكم خليك بتختار الناس صح عشان الموضوع بيكون ميسر اكتر بالناس القليلة اللى هتعرف وهتساعدكم الناس دى وقت ما يحصل مشكلة - لا قدر الله- أو فرحتكم هاتكون الضعف بوجود الناس دى.

_________

الكلية مكان قمئ. البيت مكان مشتعل مفيهوش راحة ولا هدوء. الشارع بقى مستفز بكل ما تعنيه الكلمة من محتوى، صحابك اللى مش بيكلمك عشان سبب تافه واللى بيتخرج و بيكلمك عن ما بعد التخرج و اللى بيتريق على إنك لسه قاعد واللى بيحكيلك مشاكله مع التقدير و إنه مش عاوز يخرج بتقدير جيد و نفسه فى جيد جداً(طلبات مشروعة بس نراعى بعض يعنى). 

_________

أما تلاقى حد يريحك ما تخسرش الشخصية دى عشان هى فرصة مرة واحدة فى العمر، لو خسرتها مفيش اعادة ولا مرة كمان. اتعشت كدا يا معلم ومفيش فرصة ثانية ولا محاولة ثانية إلا لو مكتوب ليك فرصة ثانية، بس بحكم التجارب المحيطة الكثيرة هى مرة واحدة بس. مرة بتمسح كل اللى فات وبتهون الحاضر والجاي بيكون مبروك هو والحاضر وبيكون فيه رزق من غير ما تعرف الرزق دا جاي ليك منين.