قصه منتحر بشكل غير رسمى !

تيليفون بيرن بعد نص الليل

هو : الو !!!!

المتصل : ايو يا معلم الحق واحد صاحبنا الله يرحمه

هو : صاحب مين ؟؟ وانت مين ؟؟

المتصل : انا احمد يا بنى آدم فيه ايه ركز وحياه ابوك مش ناقصه ، واللى مات واحد كان معانا ايام المدرسه

هو : معلش يا احمد لسه مش مجمع ، مين بقى اللى توفى دا ؟؟

المتصل : واحد من ايام المدرسه كان معانا فى اعدادى اسمه سامى

هو : سامى مين دا ؟؟!!! ........... ااااه افتكرت الواد دا  ، بس الواد دا كان ما شاء الله عليه رياضى !! ايه حصله !

المتصل : بس تعالى ونتفاهم

بعدها بربع ساعه وفى المستشفى

هو : ايه يا بنى آدم يا بومه ، عرفت ازاى انه توفى ؟؟ وايه خلاك تصحينى وتجيبنى كدا ؟؟

احمد : سامى الله يرحمه توفى جرعه زياده

هو : ايـــــــــه !! ، بتتكلم ازاى دا كان ما شاء الله عليه صحه ورياضى ، ما صدقش الكلام اللى بتقول عليه دا

احمد : زى ما بقولك كدا ، سامى الله يرحمه انا كنت معاه فى آخر ايامه

كان رياضى ايام اعدادى ، كان بيتكلم عنك كتير اوى وكان نفسه يشوفك بس انت عيل نذل ماعرفتش اجيبك تقابله لانك عاملى مشغول

سامى بعد ما خلص ثانوى دخل تجاره ونجح وجاب تقدير جيد على ما افتكر ، بعد ما خلص كان بيحب نورهان زى ما انت عارف

لما قرر يتقدم كان معاه ربنا والشغلانه اللى بيبنى نفسه منها

طبعا خد احلى قلم واترفض

هو : اكيد دا احنا فى زمن الفلوس ، معاك تدوس ، من غيرها تتداس

احمد : اكملك الحكايه ، بعدها قرر يكافح ويشتغل شغلانتين وفى فتره كانو 3 ، بطل يلعب رياضه وجسمه بدأ يبقى مش مظبوط ودى حاجه زعلته

بس قال كله فداها ولما يتقفل علينا الباب نرجع اللياقه تانى

كافح 3 سنين وقبلهم جيش سنه ، جاب شقه وظبط حاله ، لما راح يتقدم لنور لقى بدايه للنهايه

نور اتخطبت ، ولما راح يسأل حصل ازاى ؟!!!!! لقى الصمت منها ابلغ رد

اهلها ارغموها على انها تنساه وتفكر فى المستقبل مع العريس الجديد صاحب الدبلوم اللى شغال فى البترول

بعد ما حصله الموضوع دا اكتئب اكتئاب حاد ، واكمنه فى منطقه انت عارف شعبيه الى حد ما اتلم على العيال المدمنه وبدأ طريق الضياع

واللى قهره ان كله راح منه

فمبقاش باقى على حاجه .. ولما قرر ربنا يهديه ماحدش سابه فى حاله

ربنا يرحمه ويغفرله

هو : بس انت ليه بتقول انه كان عايز يشوفنى !!!!

احمد : تخيل انه فاكرلك موقف جدعنه من ايام اعدادى وكان نفسه انت اللى تقف جنبه زى المره اللى فاتت

كان بيحب فيك الرجوله اللى ما قابلش زيها فى كل المعارف اللى عرفها






القصه دى يمكن تكون اتفرمت مليار مره فى افلام ومسلسلات ، انما انا عايز اقول حاجه ما سمعتهاش كثير   ، ما تحتقرش من المدمن ، هو ضعيف الاراده من الظروف ،وانت ممكن تضعف ، قدم ايد المساعده وخليه يبطل الادمان .

فى ناس مدمنه حزن واكتئاب ، لو هتتريق عليهم ياريت تسكت ، هتقول كلمه تهديهم اتكلم .

ياريت ماحدش يبقى يحب :P :D  الموضوع فيه مخاطره قدها خوض التجربه ، هتضعف وتكتئب وتبقى سامى تانى اعتزل الملعب من قبل ما تنزل .. الموضوع ليس لعبه


القصه وهميه الى حد كبير ولا فيه سامى ولا احمد ولا هو بس القصه واقعيه الى حد كبير من الوسط اللى انا تواجدت فيه من 8 سنين :D