اقرأ الالم !

حاله من الزفتوتيه مسيطره على صاحبى

 بسأله : ليه كدا؟؟

هو: انت مالك !!

انا : ياعم والله انا بطمن عليك .. طيب قولى كدا بتفكر فى ايه

هو : والله ما بفكر فى حاجه بس انا صعبان عليا نفسى

انا : وتقولى انت مالك  .. قول يا عم دا انا صاحبك واخوك احكى يا ريس

هو : ولا احكى ولا حاجه يادوب كل اللى جوايا ليه ؟!!

انا : هنشتغل فى الازرق بقى .. بطل الغاز وانطق بقى ابو معرفتك

هو : يا عمى براحه عليا انا هقولك الفوله واللى فيها .. انا وعدت وعد وخلفته وخسرت الشخص بسبب الوعد دا

انا : اممممممم - فى سرى- يخربيت ابو الوعد على صاحبته على اللى خلاك تحب فى يومك

هو بيكمل : وعمرى اللى فات من بتاع21 سنه اهو ولا جددت حاجه ، لا انا مثقف ، ولا شاطر فى شغلانه تسند

انا : فكها يا كئيب يابن **** ليه مسودها كدا !!!

هو : المفروض ابقى ازاى يعنى ؟؟ منفض للحياه وماشى بالبركه وعيل فاضى زيك كدا ؟؟

انا : يا عم ما قلتش كدا بس ما تبقاش شايفها سوده كدا ..خلى عندك تفائل شويه

هو : انا شايف الواقع .. هتخرج على 24 سنه .. جيش 3 سنين .. يعنى بالميت اكون نفسى علشان احقق كل اللى انا عايزه يبقى عندى 35 او 40 سنه !!

انا : عارف كل دا بس هتعمل ايه يعنى !! .. قدرك ومكتوب عليك

هو : ونعم بالله قوم بينا من هنا عايز امشى

انا : لا يا عم هكمل الحجر واحصلك .. بس رايح على فين ؟

هو : هغير الواقع

انا : -ضحكه اسمعت النمل فى الجحور- انت عبيط يابنى !! .. هتعمل ايه يعنى ؟؟

هو : جاى ولا الدور الجاى ؟

انا : لا ربنا معاك

 تانى يوم الصبح"  موت طالب علم والسبب مجهول "

يمكن هو مات  بسبب انه عايش حلم قتله  نظام حياه وهمى ، دا واقع ان فى ناس ماتت بسبب قرارت تعسفيه ، فى ناس ماتت من جواها بسبب انها ماشيه صح وما لفتش ودارت 

ربنا يكون فى العون ويحيى القلوب ، ويهدى او يهد من فى ايديهم تغيير القرارت حتى ولو كانت صعبه المنال لكن يكفيهم ان ينولوا شرف المحاوله

جيل الرضا بالقليل ارحم جيل قرر التغيير :)