محصول نصف العمر الإفتراضى بالمحروسه !

فى أول فتره بعد ما عرفت نتيجة أول سنه ليا فى الكليه تصورت إن نهاية العالم لما يحصل ليا كدا ، مريت بفترة انقلابات وخسائر معنويه وحسيه ، لكنها الحمدلله عدت على خير واكتسبت منها خبرات وصداقات كتيره وجميله .

بعد المده المقضيه فى المحروسه عرفت ان الحياه عباره عن تقلبات ومطبات ، هتعدى عليها شئت أم أبيت ، هتقابل الدكتور الغلس والدكتور الفاهم وملزم انك تتأقلم معاهم ، هتقابل الزميل ( المصلحه ، المتعاون ، اليائس ، متفائل ، الدحيح ، واللى بيحاول يكون شاطر ) كل الأصناف دى واكتر هتقابلها فى كليتى وهتتعامل معاهم كلهم ، يمكن فيه جزء منى بيرفض الوجوه المتعدده فى التعامل وبتعامل بشكل و وجه واحد مع الكل - وهذا ما يخالف تقليد جيلى للأسف - لكن أهو الواحد بيتعلم خامات الناس الموجوده علشان أعرف افندهم وأصنفهم وأقدر أتعامل مع كل نوع منهم بأى حدود .

المده اللى قضيتها دى عرفت فيها كم شخصيات صعب أحصر عددهم ، وإتعلمت من كل شخص قابلته فى الفتره دى ، سواء كان قريب منى ولا بعيد اتعلمت منه حاجه فشكراً ليكم سواءً كنت كارهين معرفتى او سعيدين بيها .

فيه جزء لا يمكن إهمال فضله عليا من بعد ربنا وهو علاقاتى المتعدده مع الناس ، يمكن الناس بتزهق منى من كتر ما بسلم على ناس كتيره فى الكليه ، الحمدلله عليها نعمه ، بفرح أوى لما أمشى فى كل مكان ألاقى ناس اعرفها أسلم عليها وأقعد شويه معاها ونهزر وأمشى ، فيه إحساس رائع لما تكون عارف ناس كتير وربك من عليك بنعمة القبول والمحبه ، أدمها نعمه عليا يارب .

ولما أقولك الشخصيه اتحسنت كتير جداً ما هقدر احصر الأسباب لأنها كتيره وكله كان بفضل الله فى الأول ، إشتغلت فى أماكن ليست بالقليله لكنها أثرت فيا ومازالت بتأثر وبكتشف كتير فيا ، يمكن مازلت بمساوئ كتيره لكنت اتحسنت فيا حاجات كانت بتعوق مسيرة نجاحى ، يمكن مشيت من مكان كان بالنسبه ليا حلم هيتحقق ، إتخليت عن أملى فى مكان كنت هعمله فى سبيل حلم تانى بدأت شمسه فى البزوغ ! فيارب وفقنى وقدرنى أحقق ما فيه صلاح ليا وللعالم كله .

 

إلى كل شخص زعل منى فى الكام سنه اللى فاتوا أحب أقولك أنا  آسف ، ولكل شخص عزيز على قلبى أوعدك لأبد الدهر انت مكانك محجوز ما هيتغير ، والأيام الجايه -إن شاء الله -  هتزيد معارفى وتزيد خبراتى وتجاربى ، ثقتى فيك يارب تزيد مع كل يوم وأملى فيك ان حلمى هيتحقق بالسعى والجد بتزيد برضو .

الفتره أثمرت بحلم تانى غير الأول والمكتبه الشخصيه ليا هيتغير نظام ترتيبها ومحتواها عن قريب إن شاء الله ، يمكن هيكون فيها مخاطره كبيره جداً ومشقه رهيبه لكن أنا بتحدى نفسى إنى إن شاء الله هحققها وأحقق ما أنوى إليه !

الحمدلله كدا انا قضيت سنتين ونص فى الكليه ، بس أنا لسه فى التيرم الأول من سنتى الأولى بعد الاعداديه .

 

أخيراً وليس آخراً أملى فى ربى عظيم ، وإن شاء الله هنثبت إننا جيل هيعلى بمصر وبدينه لكن محتاجين شوية صبر ، وتستوى عقولنا فى أفران التجارب ، فتفائلوا خيرأ لان ربكم وعدكم بأنكم ستجدوه - إن شاء الله - .