تأثيرات النتيجه ! =) #الحمدلله

-
جانبين هيتكلموا : الأول الأهبل والثانى الكئيب

الأول : كل شويه تهف عليه ويقوم مبسوط إن أصحابه بيكلموه ويهونوا عليه .. كل لما يفكر يفتكر إن الدنيا لذيذه والحياه جميله ..
الثانى : يعنى سنتين فى الكليه وما جبتش تقدير !! جتك نيله عليك وعلى خيبتك يا أهبل ..
الأول : يا سيدى ما أنا وإنت عارفين إن النظام دا والتقييم فيه أصلاً غلط وغير واقعى !..
الثانى : وإنت يا حيليتها لما تتخرج وإنت شايب هتقول كدا للراجل اللى بيسألك ليه قعدت كل دا فى الكليه ؟!!
الأول : أكيد الموضوع لن يتطور أكتر من ماده والموضوع هيعدى على خير إن شاء الله .. بطل بقى الزفت اللى إنت فيه ..
الثانى : خليك عايش فى البرج العاجى .. لا ناوى تفلح ولا ناوى تتغير !
الأول : إسم الله عليك !! هربان وجبان وعمرك ما قررت تواجه خوفك وفشلك وسقوطك .. تقدر تقولى إنت فالح فى إيه ؟؟

( صمت ... صمت ... صمت ) !!

صوت الضمير : كل واحد فيكم يتهد ونقعد قعدة عرب ونشوف حل !!

الأول : شوف أنا هقولك حل .. نقوم نجيب ورقه وقلم ونبدأ نخطط هنعمل إيه فى الإمتحانات اللى جايه دى !
الثانى : حياة خالتك !! على أساس إننا ما عملناش كدا قبل كدا ؟!! إتنيل شوفلك حاجه تانيه ؟
الأول : ما تتكلم إنت ؟
الثانى : ممكن نقعد ندعى ندعى ندعى ربنا يوفق يا إما موته ونرتاح !! ها قلت إيه ؟
الأول : غور يا جاموسه من هنا .. موته !! وندعى !! داهيه تشيل اللى خلاك تفكر
الثانى : طيب ما تقول حاجه إنت !!
الأول : مش قادر أتكلم ! يعنى فى يوم السعاده العالمى صاحبنا قرب يموت من الهم + إمتحاناته على الأبواب والحاله متشنكله فوق راسه :/
الثانى : خلاص ياعم نساعده يندمج فى الجو ونخليه يعمل اللى يشوفه !!
الأول : قصدك نسيبه فى النكد ؟ ونعيشه الجو الغامق ؟
الثانى : دى الحاجه اللى بيحبها ! ودائماً عايش كدا
الأول : وبعدين فى غشامتك ؟ .. لأ طبعاً يجرى إيه لما يشيل ! وإحتمالية إنه يعيد سنه كمان فى الكليه وارده ؟ .. نهاية العالم ؟ أكيد لأ .. ثم إنه كفايه الجمله دى
" لكل اللي شالوا مواد ..تاخذوا درجاتي و ترجعولي أمي :D ساقطة وأمي عايشة أفضل بكتير من متفوقة وامي مش موجودة  " 

الثانى : .............................................. - صمت -

وإنتهى النقاش على لاشئ ! فقط أن الوضع غير مريح والأمر فى مهب الريح والعواصف وقد تنتج بعض الكوارث الإنسانيه .. يكفى الشعور بالهرب من الفشل ! قذاره فى رقبة حالم ! ....

المحصله : " 4 لام .. 1 ضاد .. 1 ضج أولى .. 1 ضد إعدادى " #الحمدلله

تعليقات

  1. Unknown20 مارس 2013 في 1:22 م

    حضرتك الاسلوب سلس جدا , بس المشكلة فى ان الشخصيات دخلت فى بعض فى النص فـ كدا الغموض بقى مسيطر و اعتقد ان دا نابع من التضارب اللى جواك ,,
    بس سيبك من كل دا ,, اقولك سيبها على الله اعمل اللى لما تيجى تقف قدام ربنا و تدعى تبقى متأكد انه مش هيرد ايديك صفرا خائبتين , و لما تقف قدامه يوم القيامة تبقى متأكد انه مش هيحاسبك على تقاعسك و دعوتك ليه من غير ما تكون عملت بيها اولا ,,
    مش هاكدب عليك و انت عارف ,, بس الكلمة دى بجد ,, انت تقدر تجيب امتياز الترم التانى و المجموع الاجمالى جيد جدا ,, و الله تقدر وم مسأله ذكاء او مذاكرة ,, بس حط دى ف نيتك انك هاتعمل كدا علشان تعمل حاجة بعد كدا ,, عارف ان التقييم بالدرجات غلطة بشعه من المجتمع , بس علشان تغيرها لازم تتخطاها ,, فلازم يبقى معاك درجات علشان تقدر تغير المنظور و المنظومة كلها ,, طبعا مش هاعمل موتيفيشن لاجدع اتش ار ,, بس يا احمد الكلام دا بجد مش بحور عليك فيه ,, و ان شاء الله خير جدا :D

    ردحذف
  2. aya tullah23 مارس 2013 في 4:17 ص

    hhhhhhhhhhhhhhhhhhhhhhhh mesh adra abtal de7kk feen elfasheel tayb :P

    ردحذف

إرسال تعليق

المشاركات الشائعة من هذه المدونة

في رثاء عزيزةٍ

-
إليك، بعد الكثير من التفكير والكثير من التردد، سأرثيك، لست أعلم أو أدري لماذا ولكنهم يقولون أن فاقد الشئ هو أفضل شخص يعطيه، ولأنني لم أنلك، سأرثيك. كنت السند والونس الذي لم أعترف بوجوده لأحد، كنت دوماً تنتظرين عودتي، لا تملكين شكلاً أو هيئةً، أنت فقط هناك عندما أعود من مشوارٍ طويلٍ احتاج فيه لمن يحتضن كل الهم والتعب. سافتقد كثيراً الأفكار التي تأتيني حينما أتعثر في زحمةٍ أو عندما يكون الكون كله ضدي وأنت فقط هناك، تجلسين في هدوء وصمت. المخلص دائماً وأبداً، أنا.
قراءة المزيد

Mania -1

-
 للأسف معنديش كلمة عربي توصف اللي بمر به، في نفس الوقت معنديش الطاقة أفكر بالفصحى، بالعكس عندي أفكار وأصوات كثيرة وكلهم بيصرخوا في نفس الوقت وكلهم عايزين يخرجوا. كانت الدكتورة بتتكلم معايا في أني محتاج أكون صداقات نسائية جديدة لأني محتاج رفيقة درب لأن الوحدة دي بتزيد من حالتي سوءً، حالياً عرفت كذا شخص جديد وبقى في أشخاص ثابتة في يومي بشكل صحي، هل ناوي أعترف بكوني محتاج لحاجة زي كدا آه، أنا معترف.
قراءة المزيد

نعكشه

-
 الحقيقة في كل الأمور هي أصعب شئ في المواجهة، بتقدر بكل سهوله تهرب وبتقدر بكل سهوله تعلق المشكلة على شماعة غيرك ولكن في الحقيقة جزء من النضج أنك بتواجه وبتقعد فترة كبيرة بتحاول تتعافى من الفكرة والمواجهة، بيكون شئ مؤلم جداً أنك تكون ضحية نفسك، ضحية اختياراتك وضحية تصرفاتك. هل هنا نقدر نقول أننا ضحية نفسنا؟ أعتقد محتاجين نعمم المصطلح ونعمم فكرة أنك مهما حاولت ها توصل لمرحلة من المراحل حياتك كلها متعلقة على لحظة الإدراك اللي هاتعرف فيها أنك خربت حياتك والخراب اللي أنت في دلوقتي ما هو إلا نتيجة اختياراتك. ـــــــــــــــــــــــــــــ بتعدي الأيام وبتعدي اللحظات المملة السخيفة أبطأ من أي وقت، الملل والزهق حاجة من الحاجات اللي بتخليني مستاء جداً، الخروج من البيت لو مش لحاجة مشجعة بفقد الرغبة في أني أكمل المشوار خصوصاً لو العربية مش معايا، بكون اللي هو ما فاكس كل حاجة وياللا بينا نلف ونرجع. الأغاني بقيت مملة، الشغل ممل وجحيم. بمناسبة الجحيم، أخيراً خدت هدية يوم ميلادي من لُبنى، الكوميديا الإلهية، الأناشيد فشيخة والرحلة اللي بيمر بها لحد ما يوصل للجنة ممتعه، مشكلتي مع الهوامش اللي فيها كثير
قراءة المزيد