شخابيط سكيزوفرينيه

باقى من الزمن على إمتحان الكهربيه 13 ساعه أو أقل ، لحد دلوقتى ماعرفتش ميعاد الإمتحان ولا مكانه لكن هخلص اللى بكتبه وأعرف .. حاسس بشعور مبسوط شويتين إكمنى مخلص الماده بنسبة 80% وفاضل أحل إمتحانات وجزء بسيط .. يمكن أنا مستغرب الموضوع جداً وخايف بس خلينا نعيش اللحظه بلحظتها وبكره يعديه ربنا على خير



أدين للمحروسه دى بكل شئ حلو/وحش حصل ليا فى الفتره اللى فاتت دى .. بقالى فيها 10 سنين أهو إتغيرت فيهم تغير جذرى للأسوء فى كتير من شئون الحياه ..


كرهت أهلى أكتر وبقيت شخص صامت فى البيت بتكلم كل سنه ضوئيه مره .. بعامل لولو أحسن من أى كائن فى هذا المكان..الكليه بالنسبالى مكان حلو بس بعد المده دى هو مجرد حضور محاضره بنت ستين جزمه وأقعد ويا العيال ونسف شويه وبس..زمان كان النادى متنفس لكل الخراء اللى بشوفه وبفرغ طاقه حالياً كرشى هو رد الفعل الطبيعى لهجر النادى أو أى نشاط وحركه...



بقيت عصبى بزياده لدرجة إنى هتكت الإعصاب والعضلات المحيطه بالصباع اللى فى النص فى إيدى اليمين مرتين لمجرد إنى ضربته المره الأولى فى الرخام،والتانيه فى حيطه وغالباً كانت مسلحه..



عيشت فى قطر وسافرت السعوديه والغردقه ورأس سدر وإن شاء الله هسافر الأقصر وأسوان كمان أسبوع . بعدهم بقى أسبانيا إيطاليا فرنسا أسكتلندا وأستقر فى أفشخ فرع لجوجل على مستوى العالم واكون شخص تنين كدا ...




كنت ما بطيقش صنف البنات وبعدين حصل ظرف وإتدلقت وبعدين رجعت لأصلى تانى .. طالع عليا فى الفتره دى سفه بتاعة ندا بس الواحد سايبهم يعيشوا الدور أديهم بيضحكوا (نفسى أقتلهم بس مش عارف دول كتير جداً ) .. نفسى أقابل البنت اللى فى دماغى علشان أتعرف عليها وتكون مظهر جمال فى حياتى بس .. الجواز فكره فاشله  والأطفال دول مشروع معفن جداً ويارب أموت قبل ما أتجوز أو أتجوز واحده ما بتخلفش لو مكتوبلى جواز غصب عنى وتكون مظهر الجمال هى مراتى وأمرى لله ...




بالنسبه للفشل بقى أنا حالياً ساقط سنتين فى الكليه وبقالى 4 سنين ولسه فى سنه أولى هندسه قسم قوى كهربيه .. فشلت فى 3 ثانوى وجبت مجموع معفن وجبت درجه وحشه جداً فى الرياضه .. بشرح للناس حلو جداً لدرجة إنهم بيجيبوا تقديرات وأنا بشيل الماده بجداره .. فشلت أبطل أتكسف و وشى يحمر والموضوع دا مسببلى حفلات ومسلسلات سف حتى الركب " وآخرهم ندا طبعا" ..



فقدت المرح وصفة الرغى ومازلت عصبى وصوتى بدأ يكون عالى وفقدت الروح إنى أعمل أى شئ مفيد أو حتى تطوعى ... مش عارف أنا بعمل إيه هنا ولا إيه لازمتى وحاسس إنى هعيش كتير جداً فلازم أشوف مصيرى وأحدد أنا رايح فين وليه وإزاى .. فقدت ميلى للهندسه وبدأت أكره أى شئ جاى منها لو فيه قرف ووجع قلب وبقيت بستسهل أى حاجه وأتشعبط .. فقدت كم القرآن اللى كنت حافظه وبقيت فاقد للإيمان أو الثقه بأى شئ .. بقيت بعيد جداً عن ربنا وكل ما بقرب منه بتحصل حاجات كتيره بتخلينى أفقد القرب أو الصله ..


بقيت مريض بالضغط (عصبياً فقط بس الموضوع خطر لإنه ممكن يقلب ) .. عندى القولون العصبى والعادى .. صاحب إيد يمين ضعيفه نوعاً ..



بقيت بعرف أكتب باليمين والشمال ..زادت نسبة قراءتى للكتب وخصوصاً الروايات .. صحابى زادوا وبقوا مختلفين فى كل حاجه ودا شئ أنا حابب الفتره دى بسببه ..


للأسف لسه عند يقينى إن فيه كتير من الناس اللى حوليا دلوقتى فى يوم هنكون مجرد ناس عرفت بعض زمان وهتختلف بينا الطرق وهتؤدى لإننا مش زى دلوقتى أو زمان .. بس المرحله حلوه فى لحظتها نعيشها


لسه بكره التصوير وما أعرفش السبب ويمكن يكون جزء كبير إنى بتكسف .. بقيت بسلم على البنات تانى عادى زى زمان بعد ما كنت قررت بلاش علشان ما تحصلش مشاكل وفى الحقيقه بدأت أحس اخيراً إن الوضع كدا طبيعى ..


نفسى أكون حر إلى حد ما وأعيش حياتى بنوع من المرح وإنى أكون إجتماعى وأوفق بين الناس وبين ما تطلب ويكون دا شغلى اللى بقبض منه فلوس وحياه وفرح .. عايز أعمل شركه بتنظم أى مناسبات و EVENTS لمجرد إن دى حاجه هشوف الناس وهى مبسوطه وإنى هكون سبب فى إنى أوفق المناسبه دى ، هكون أول مهندس يعمل كمية حاجات متناقضه وغير بعضها لمجرد أثبت للناس إن الهندسه والدراسه فى هندسه ينفع يتعمل جنبها كذا حاجه بس الموضوع كله قدرات وتركيز صح.. عايز أكون مهندس بيفهم فى الماركتينج وعيل PR قرد وعندى Networks & connections تخلينى أسهل على أى حد حاجه واقفه قصاده وأساعد الكل فى أى حاجه ..



-إن شاء الله - فى خلال سنتين هكون سافرت لفرنسا إيطاليا والأقصر وأسوان ، بدأت أكون تنين فى الإنجليزى وبدأت أرجع أتكلم فرنساوى شويتين .. هكون فى سنه تالته وجايب تقدير فى تانيه جيدجداً قريب من الإمتياز وفى أولى طلعت صافى وماشى فى تخليص ورق التدريب فى P&G وإتدربت فى شنايدر و ABB ..



ربنا يهدينى للصح والخير ويقوينى ويصلح من حالى