هلفطه
التدوينه
دى هتتكلم عن ملخص الكم يوم اللى فاتوا ومكتوبه بالعاميه وفيها كلام كتير يصنف هرى
السنه الجديده
بدأت بإعادة نفس الحادثه واللى حصلت يوم 5-5 .. السبب المره دى أتفه بكتير من
المره الأولى التافهه فى الأصل .. أنا عارف إنى تافهه .. المهم دلوقتى أنا بدون بالجبس ودا شئ
جديد .. لازم أبطل عصبيه وأتعلم أخبط حاجه تكون حنينه شويه على إيدى أو ألبس جلوفز
للوقايه من الجبس!..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
My D.M
اليومين دول فيها كمية أكل وتصبيح وتمسيه يجوعوا الشبعان وحابس بكوباية شاى
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
هكلمكم شويه عن سفرية رأس البر .. أولاً هى كانت
مفاجأه رغم إن شامى كان مكلمنى عنها..طلعت وأنا متخانق مع البيت كله علشان شايفين
إنى بستهبل وبضيع وقت –دا حقيقى بس تفكيرهم بيخليك تصمم تعند وتكابر- وتطرق الحديث
لكلام لا داعى للخوض فيه..سافرت وشندى كان هيلبسنا فى مقطورتين ورخم على الظابط فى
الكمين وقاله " أنا عايزك تشوف رخصى إتفضل " وخلانا كلنا نطلع وساعتها
كان أول يوم أجيب فيه بطاقتى من السجل ومكتوب فيها "طالب بكلية الهندسه جامعة
القاهره" ، لحظتها طبعاً قلت بس هيتحفل علينا إكمننا حاطين عليهم بس الحمدلله
مرت بسلام.. وصلنا راس البر بعد ما أكلنا من الريست بتاع محطة البنزين اللى
الساندوتش بيتباع فيها ب 18 جنيه وثمنه لا يزيد عن 2.5 لو مدلعك آخر دلع ، بس
الجوع كافر وممكن يلحد ..
كان معانا عمر ويوسف اللى كان سايق وعبدالرحمن
الشامى (أظن مش محتاج يتعرف مين هو! ) .. ذاكرنا قصاد البحر وإتفرجنا على أفلام من
البروجيكتور على الحيطه .. نزلوا هم البحر وأنا قعدت زى الوليه المُطلقه بصورهم
ومستنيهم برا علشان الجبس .. سألنا بعض أسأله وسمعت رأى فيا لطيف .. كانوا أيام
غيرت فيهم جو والعيال إتبسطت جداً
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لازم تغير العصبيه وتبطل كلام فرعى وتبدأ تعتزل
الناس فعلاً ، قريب هيتخرجوا يشتغلوا/يتجندوا أو لا قدر الله يموتوا وإنت لسه طالب
..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
النهارده بالتحديد كنت ماشى مع رفيق والحقيقه أنا
سعيد جداً بمعرفة الشخص دا فى الوقت دا من الحياه! ، المهم عرض عليا عرض أنا كنت
متوقعه منه بس ما رديتش عليه بنفس السيناريو أنا سكت .. حسيت إنى مفروض أحسب
الموضوع بشكل أوسع ومفروض أبدأ أشتغل فعلاً وأحوش لكل الحاجات اللى نفسى أعملها
وأولهم كان عرضه دا..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الشعور بالجفاء والعدم حلوين وبيخلقوا محيط من
البراح بيخسرك كتير جداً ليكن بيوفر مجهود عصبى هتحتاج ليه قدام..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
من ساعة ما بدأت السنه ما أكلتش cupcakes .. قصه قصيره حزينه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الشغل فى المصالح الخاصه وبأجر يتناسب مع مجهود شغلك سلاح ذو حدين ، وإنك تقبض الفلوس بتاعتك بقى دا المستحيل ذات نفسه !
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
مفتقد الميتينجز وال died lines بشكل مريب ، حاسس بفراغ فى حياتى من وقت ما بطلت أتبرع بوقتى لشئ قد يكون مفيد لغيرى
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
يارب أنجح التيرم دا واللى جاى صافى وأشتغل فى مكان محترم وأستفيد منه فى كل الجوانب وأنول البركه والرضا
تعليقات
إرسال تعليق