22

ملخص السنين اللى عيشتها " إنت بتتهرب من تحمل مسؤولية نفسك،بس بتتحمل مسؤولية غيرك وبتساعدهم"

مستمر على العادات الهباب والكسل واللاشئ أهم المرافقين ليا فى الفتره الفائته وخصوصاً الملعون الأول.

الخسائر فى دائرة المعارف بالزوفه! وعلى المقابل ناس قليله بتدخل للدائره. لكن منهم من هو جميل جداً،ومعرفته كانت سبب جميل/وحش فى التغييرات اللى الواحد وصل ليها، الناس معادن ، الهرى فى الكلام دا كتير جداً ومفيش منه فائده..بس هتفضل تتعلم وتتعامل مع الناس وتعرف قيمة تربيتك وقيمة حاجات كتيره. 

الأحلام فى الفتره الأخيره من الأشخاص وإنى فاضى أطلع فى أحلام الناس شئ سئ او نذير غير مبشر.

بقيت بكرش ولسه الحمدلله رفيع زى مانا .. بقيت بلبس لبس أخويا كنوع من الذل بزياده وفى نفس ذات الوقت إحساس إن الواحد بيليق عليه كل حاجه موجوده فى البيت.

وصلت ل 60 بس خسيت وبقيت ما بين ال 58 وال 55 #بؤس

بدأت ألعب تنس .. بطلت ألعب تنس .. رجعت ألعب تنس تانى

شعرى طويل لثالث مره والناس كلها بتكرهه .. عظيم (وبمناسبة الموضوع دا حابب أقول إنى عارف إن كتير من الناس مش عاجبها شكله وبتحاول تخلينى أحلقه ، الناس فى الشارع بتشاور عليا وتتريق على شكلى ، البنات لما بكون فى مكان بيكونوا قاعدين بيشاوروا عليا ويشتغلوا شغل البنات برضك ! ، عالم جميله أقسم بالله )

لسه فى سنه أولى .. أحمل لقب باق مرتين (ويارب يبعد عنى)

حضرت حفلة أنغام..والراجل خلانى ألبس كرافات غصب عنى -.-

تخطيت ال 1000 بنى آدم على الفيسبوك وكسرت 50K تويته

مات ليا واحد من معارفى القريبين (على حسب ما أتذكر حالياً ) .. إتصاب كتير .. كان الأغلب ناس من بعيد عنى

حطيت عليا وبدأت أقرأ روايات غير العربى أخيراً

فلحت فى إنترفيو إنجليزى. ( وما فلحتش فى أى إنترفيو من بعدها والحمدلله )

بقيت بنزل من البيت عادى بالبنطلون الترينينج .. وخرجت برا حدود بيتى بالشبشب مرتين .. مره أول ماطلعت نتيجة أولى أول مره .. والمره التانيه لما كنت رايح أقابل الواد كوكى "أكرم على" مع شيرى "محمد شريف"

لسه بتكسف والموضوع بقى مُستغل

الإنجليزى بدأ يتحسن

سنه وشويه .. 4 إنترفيوز كلهم مرفوض

إشتغلت كذا شهر

بعمل اللى على مزاجى

جبت التابليت .. التابليت باظ .

ASME PR session at BUE

سفرية الأقصر وأسوان ، ومتعة ركوبى للقطر ، بعد كدا حلفان يمين طلاق مانيش راكبه تانى أبداً ، القعده مع والدة عبدالرحمن طول الطريق وكلامها !! قد إيه فارق معايا لحد دلوقتى ومبسوط جداً كل ما أفتكر إنى سيبت العيال وقعدت معاها.

جبست إيدى تانى مره (1-1)

سفرية رأس سدر

يوم ميلادى هيكون آخر يوم فى الجدول.

البروم هيكون مرتع للصعابانيات وكدا. ومن الواضح جداً إنى هيتعمل فيا مقالب كتيره

لعبت إسكواش ، وكسبت ماتشين كمان

لسه ما قابلتش الريد هيد وعيب لما يكون صحابى بالزوفه ومفيش حد يعرف من صحاب أصحابه بنت ريدهيد/بلوند قصيره تنال شرف إنها تعرفنى !! مفيش حد هيset me up ؟ كلكم أوغاد

بيطلع عليا ألقاب جديده وكلها حاجات غريبه عجيبه

الإشارات حوليا بتقولى إنى هسافر وقريب،بس مش هكون مبسوط زى ما أنا متخيل بالعكس هيكون فيه حاجات أكتر تكدر بس شعور إنى بعيد عن كل الحاجات دى هيصبرنى وهكون بأدى أحسن من الأول ، شعور الغربه عامةً بيخليك تتحرك وتتحفز إنك تعمل حاجات كتيره ، لكن الكومفرت زون اللى قاعدين فيها دى عمرها ما هتخلينا نعمل أى حاجه مفيده بالمره. اللهم سفر بعد التخرج ويخلص الموضوع اللى فى بالى بلوشى كدا من عندك .

زادت الأماكن اللى نفسى أسافر ليها 
1- إيطاليا : زياره لكل الأماكن الأثريه وأعمال مايكل أنجلو ، وأقعد يومين فى نابولى آكل باستا وبيتزا لحد ما أتكرعهم ، وأكون لقيت my redhead soul mate ونقعد سوا فى فينيس ونقضيها بقى
2- فرنسا : اللوفر وأتسنكح فى البلد دى شويه .
3&4- ألمانيا وروسيا : الواحد يروح يشوف بلوندز أولاً. ثانياً ألمانيا لازم تتزار.
5- المالديفيز : كفايه إنى ساعتها هيكون معايا المبلغ دا وأقعد إسبوع أشوف المناظر الحلوه دى .
6- أسبانيا 
7&8 - لبنان والأردن

مجموعتى الإلكترونيه بتزيد بغباوه مع كل سنه! لدرجة إنى حاسس إنى هقبض المرتب من هنا ويخلص عليهم من هنا

كم الأنيمى اللى بتابعه أو خلصته لطيف،قد إيه فى الكارتون حياه لطيفه وجميله (كفايه هيناتا فى ناروتو )

الخير والشر أمور نسبيه جدا ، بل الشر فى ظاهره بيكون شر لكن أحياناً كتيره بيكون خير جدا

أحداث السنين اللى فاتت كلها بتتحول لصوره صغيره منغبشه طول ما هى مجرد كلام أماكن دردشه أو حتى صوره، أول ما بتدونها أو تسجلها بصوره فعليه واقعيه بتتحول لشئ محفور فى بالك وعمرك ما بتنسى التفاصيل، الكتابه نعمه والمزيكا برضو نعمه

بدأت أتكون كشئ بارد فى ظروف كتيره لدرجة إن الناس بتستغرب إزاى كدا
زرت المستشفى فى صحابى أكتر ما زرت أى حد كبير. جرينا كتير أوى على الهم وماكناش بنلحق نخلص من مصيبه غير وتطلع واحده بعدها، إتضربنا من أمن الكليه والداخليه فرمتنا والحمدلله لسه عايشين، طنت فى ملاعب الجامعه قالت "يارب اللى مسكها جديد يعوضنا عن اللى فات علشان إحنا شفنا صور كتيره وحشه وإترسخت فى بالنا" ولما عرفت إنا هندسه وياسمين قالت ميكانيكا إتخضت وأشفقت على المناظر اللى قدامها. طنت دى فكرتنى بحاجات كتيره كانت هتحصل لو كنا حاجه غير اللى إحنا عليها،كُنا هنطلع كائنات رخويه سفيهه ملزقه. شكراً يارب إننا طلعنا رجاله

هى مكسب السنادى أعتقد! عارف إنها قربت تموت بسبب كم الهم اللى متحملاه لينا وعلشانا ، وقد إيه موضوع سقوطى دا مأثر عليها وإنها قالت كل الخراء اللى قالتله دا من باب إنى أفلح وأخلص، يمكن لسه شايل منها كتير ومش هيزول الأثر مهما طال الوقت لكن لعله خير.

السنه دى عرفت أكتر قيمة المهتمين بشئ فيه نجاسه وقذاره كما السياسه أو الإقتصاد..المواضيع دى خارج نطاق إهتمامى فعلاً يمكن كانت غلطه إنى أندرج وأهتم بحاجه .. لكن فى حين من الأحيان بتضطر تساعد وتنصح أكتر من كدا بيكون زياده عن طاقة إحتمالك لكل شئ إنت بتشوفه أو بتمر بيه بجانب الأشياء دى .

الواحد كان سخيف جداً وتافهه لأقصى درجه من كام سنه .. يالا الحمدلله على كل تغيير سواء كان وحش أو حلو أكيد هيفرق قدام .. ويارب التجارب تكون ألطف وأعمق . مدى التفاهه والعبط وصل لدرجات غريبه جداً وجميل إن الواحد يكون ليه ذاكره لطيفه بتكمل معاه لمده معقوله وبيفتكر تفاصيل وكلام كتير .. يمكن ساعتها كان دا المناسب للمعطيات اللى كانت مع كل واحد فينا بس كنوع من الطمع ليه ماحصلش إننا نكون معانا أحسن من كدا ونتجنب كل شئ سئ حصل وكل الخسائر دى ؟ وكان من الممكن إن المكاسب تكون زى الحاليه بل وأكثر عظمه!.

رساله ليا بعد عشرين سنه :

تحيه طيبه وبعد/
أتمنى تكون عايش حياه سعيده بسيطه وكل الأمور مستتبه . بكلمك حالياً وأنا عندى 22 سنه إلا ساعتين -أو بالأدق إلا 6 ساعات- ، بتمنالك كل الصحه والسعاده وتكون لسه بصحتك وأحسن وبتلعب تنس وبتخرج وتتفسح ، تكون سافرت كل الأماكن اللى نفسى فيها .. تكون قابلت البنت اللى بدور عليها حالياً .. حققت المطالب اللى بدور عليها وتكونوا مبسوطين سوا (من غير أى إضافات ناتجه من إجتماعكم سوا) .. ماما غالباً هتكون غالباً ماتت فياريت تروح تزور قبرها ، ولو لسه عايشه وبخير سلم عليها وهاتلها ثمن كيلو لب هى بتحبه جداً ولتر بيبسى دايت علشان السكر.

حالياً بشرب بيتى برتقال وباكل حاجه بالجبنه بس الجبنه واضح إنها نشفت من زمان أوى .. أكيد لسه فيك العاده إياها وقاعد بتقرأ الكلام دا وإنت متضايق أو ليلة يوم ميلادك. عامةً تلاقيك حالياً جبت حوض السمك وربيت ثعبان أو بومه . عارف إنك هتموت وتشترى الأسد بس ماظنش إنك قدرت تشترى القصر أو معاك مايؤهلك للموضوع دا.

شربتلك كوباية الشاى باللبن وقعدنا سوا نتكلم فى مواضيع كتير ، وأكيد هتفتكر معايا الوقت اللى كنا فيه بنحارب علشان نخلص من الكليه وقد إيه كانت أيام ما يعلم بأذاها غير ربنا .. كم ناس غريب عدوا فى حياتك كتير لكن فيه كم شخصيه علقت معاك وفضلتوا مع بعض أو فضلت إنت حابب تفضل تعرفهم .. طبعاً مش هفكرك بالناس اللى تشبه بعضها وخصوصاً حد معين يشبه شخص كان فيه بينك وبينه شئ مميز . أكيد بتضحك دلوقتى قد إيه كانت أيام وكنا عنيدين جداً .. فاكر لما إتخانقنا مع العيال ؟ طب فاكر اليومين اللى عدوا بعدهم عدوا إزاى ؟

كنت دلوقتى بدور على أغانى شهيصه علشان Shamy's prom ، المهم إبقى إسمع منايا و عبدالقادر يابو علام .

المهم لو لسه قاعد فى مصر ومبسوط تبقى حطمت القاعده ، لو كنت سافرت برا مصر جدع. حاول دلوقتى تسيب كل حاجه وتفتكر اللى فات دا .. فكر فى اللى فاضلك.

عارف بقى الإحتمال الثانى : إنك ما لقيتش البنت ، وسافرت برا مصر وكنت زى ما توقعت فى إحتمالاتك .. حاول ما تفكرش كتير فيها عادى ، أكيد إتعوضت بغيرها كتير. وإفتكر " إنت بتُهيئ بظروف ومتطلبات معينه لتنال الشئ " فلو ما حصلش وبقيت جاهز حاول تكمل وتكون مستعد.

كان عندنا حلم صغير كدا .. إننا ندرس علم نفس .. لو كنت درسته بهنيك من هنا و High five .. لو لسه بروته زى ما إنت فى الموضوع دا قوم هزها وروح إتعلم حاجه بتحبها .

حاجه أخيره .. السنين اللى فاتت دى طلعنا بناس عظيمه وحلوه .. على قدر المستطاع حاول توصل ليهم وتسلم عليهم مهما تقلبت الظروف وتدهورت المعارف والمطامع والنفوس. خليك الأحسن على طول. الناس حاجه جميله بس اللى يصبر على أنانيتهم.


لو الإحتمال الثالث حصل .. وبقينا سوا مع بعض فى حفره 2*1 متر فخلاص خلينا نقرأ الرساله دى كل ما يكون حاصل عمرنا زوجى ويقبل القسمه على إثنين ونضحك قد إيه كُنا عُبط أوى وفاكرين إننا هنكمل 20 سنه كمان على الأرض النتنه دى.

التوقيع

أنا

"