Pre - 22

آخر أيامى فى سن ال 22 ، يمكن تكون حاجه تافهه عاديه جداً .. إزاى مهتم بموضوع زى كدا .. لكن فى الواقع الواحد لما يبص للوراء حبه صغيرين كدا هيلاقى إن العمر اللى فات دا حرفياً كان مجرد من كل شئ عظيم او يستحق الذكر . لأن فى الحقيقه هو عباره عن سلسله لا منتهيه من الفشل واللاوعى للقادم أو حتى التفكير فيه .. أحسن إنجاز يُذكر فى العمر المنصرم هو إنى فلحت وكبستهم فى أول تحدى بينى وبينهم بس التحدى اللى بعديه أهو ماطلعتش منه وبايت فى مستنقع الفشل .. فى واقع الأمر العرق الشكاى البكاى فى حياة الواحد زاد عن الحد المقبول أو حتى الذى يطاق .. وعلى النقيض ؛ النظر للمستقبل بشع بكل الإحتمالات الموضوعه فى الإعتبار أياً كانت الظروف فمصيرك هو مشؤوم ملعون طول ما إنت مستقر فى نفس المكان والzone المريحه للخمول والكسل اللى جواك والكسوف اللى بيشدك لإنك تكسل تعمل أيتها حاجه ممكن تخليك تنطلق من المنطقه دى.


 دائرة الأشخاص المجهولين فى حياتك واللى ظاهرين ليك فى كل الأمور بمعزه وكل حب .. وفى الواقع هم ما يعرفوش عنك حاجه ولا إنت متعمق للدرجه فى حياة أى واحد فيهم .. الناس دى ما تزعلش من ردود فعلها الغير مبرره أو حتى منطقيه للعلاقه الظاهره ليك . العلاقات شئ معقد-بسيط جداً ، ماحدش بيقدر يحكم على معرفه أو حتى صلة قرابه غير بعد فتره كبيره من الإحتكاك والأزمات وخلافه .. لا تتوقع جو ال fairy tales ويكون فيه حب موده وصراحه فى العلاقات سواءً كانت حب أو صداقه أو مصلحه متبادله .. دور زى ما بتقول Lily to Ted " where's the shit" أو كما قالت رضى الله عنها .. ونصيحه لمحبى ال fairy tales عليكم ب Once upon a time هيكسر كل العسليات اللى كانت ديزنى بتربيها فيكم يا شوية بتوع!.

بمناسبة إن الواحد تم على هذه الأرض كل الأيام دى محتاج أتكافئ على كم السلبيه والبؤس والسواد اللى صدرته لخلق الله كلهم أجمعين .. عايز أتكافئ إنى لسه عنيد بتكسف قصير رفيع .. هروح اليوم دا غالباً أكافئنى بإنى آكل قنبله من عند الكرنك .. وألتزم البيت ما بعرفش أقعد فى جو إحتفالات يخصنى لإنى فى الأصل ما أستاهلش يُحتفل بيا . يمكن كان فيه جزء منى نفسه فى حاجه جداً لكن "ليس كل ما يتمناه المرء ينله " .

"إخشوشنوا فإن النعمة لا تدوم "

** على الهامش : اليوم دا هيكون فيه كمية دراما لا بأس بها .