كركبة تأسلم

ولتجدنهم أحرص الناس على حياة ومن الذين أشركوا يود أحدهم لو يعمر ألف سنة وما هو بمزحزحه من العذاب أن يعمر والله بصير بما يعملون 

الآيه نزلت فى اليهود ولكن، الكائنات الهلاميه الساكنه معنا كوكب الأرض الشقيق فيها من يحرص على الحياه أكثر من الحرص على إنه يزرع نبت صالح ينفعه فى الآخره. الإخوه السلفيين هم أقرب مثال فى بالى عن الموضوع دا (والتعميم مرفوض ولكن الشريحه العظمى منهم كما سأسرد) تعالى للفئه منهم الملتزمه بالصلاه ، تعمق فى تصرفاته مع أقرانه وشوف هيعاملك إزاى لو إنت مختلف معاه ، فى الواقع سيدى الفاضل لو تعامل معاك من الأصل فهو من الطبقه الcool فى المجتمع دا ، وقرر يتغاضى عن مظهرك ولبسك . هيدخلك فى مداخل ومتاهات عجيبه لا تمت للموضوع والنقاش المطروح بينك وبينه وهتوصل فى الآخر لإنك بتلعب معاه السلم والثُعبان لا أكثر ولا أقل .

لكن نيجى للطبقه العاميه منهم ، هم شوية ناس الجنه ليهم أغلبها أفعال وكلام يُقال من اللسان لا صلة للقلب به ، يعنى يقولك إن الجلباب قصير وعتق اللحيه وإطالة الشعر .. لكن لو إنت شاب ومعدى فى الشارع ومطول شعرك ولابس جينز تلاقى شخص سمح داخل عليك ويسلم عليك :

* السلام عليكم ، إسمك إيه ؟

* فلان (ويكون الإسم مسلم)

* طيب أنا حابب أتكلم معاك فى موضوع سريعاً ، مشغول ؟

* لأ تمام إتفضل
* طيب النبى عليه الصلاة والسلام أمرنا يكون شكلنا مُهندم و و و و و ، قُل لى ما سبب إنك تطيل شعرك؟

* عادى مالوش سبب يعنى ؟

*طيب .

حاله تانيه لما ترد عليه بإن دى سنه عن النبى زى ما هم بيتكلموا بتلاقى ردود وكلام عجيب ويخليك فى الآخر تكره إنك ما قلتش إن إسمك فريدريك بولس يوحنا السابع. هم أحد أهم الأسباب فى تطفيش الأطفال الصغيرين من المساجد بسبب تعنتهم وعدم صبرهم على شغبهم وعدم تقديرهم لعظمة المسجد والصلاه. 

الكارثه الكُبرى والأعظم ، بيتناقلوا الأحاديث والآيات الخادمه لما يعتقدون وما فهم كبارهم من الدين ويخدم ما يرمون إليه وينون عليه. يعنى آيات الجهاد فى سبيل الله وعدم الخروج عن الحاكم من أحاديث والذى منه . طيب تمام ، هل بيقولوا الأحاديث صح ؟ هل بينطقوا الآيات من غير تحريف فى التشكيل وأخطاء فى التجويد ؟ يا راجل إنت بتتكلم فى إيه .

الخطيب منهم أخطاءه الإملائيه أبشع من المجازر ، والقرآن بيقرأ قراءة الصحف وأخطاء بكسر المفتوح وفتح المضموم وشغلانه عجيبه.

فى التربيه أى خروج عن أى أمر مُصدر من الأب والأم هو عقوق ولو كان إكراه على فعل لا يستطيع المطلوب منه الأمر القيام بيه ولا أى فرق معاهم .. أمرت فأطع وإلا فأنت عاق وجزاك الله صقر مش جهنم عادى!.

من حكم معايشتى لكتير من أهل الفئه دى بحكم الأحكام السابقه ، أحد أكثر المنشفين دماغهم على كلام اللى بيتقال ليهم من دراويشهم ، غير كدا كُفر وفسوق ، ما تفهمش جايبين الحاجات المكعبله دى كلها على بعضها وحطوها فى شخص واحد ونسخوها فيهم كلهم إزاى .. بس هم كائنات موجوده مش fairy tale يعنى.

أكثر من يُنخدع فيهم وزيجاتهم بتبوء بفشل رهيب ، إما ذريه فاسده ، أو ذريه فاسده وطلاق ، إما ذريه فاسده وموت الزوجه وضايع ودمار إلا من رحم ربى.

نقطة الحياه عندهم بتفرق جداً عن أى فصيل تعاملت معاه ، يعنى بيكون صعب عليهم يعترفوا إنهم مرضى حتى لو كانوا متكسحين (عارف إن دا طبع البنى آدم ، لكن بينخ وقت ما بيتعجز ) ومقتنعين تماماً إنهم معمرين فى الأرض وبالتالى نادراً ما بيفكروا فى المستقبل ، بيفكروا يوم بيومه وربنا يكرمنا بكره نبقى نخطط لليوم اللى بعديه أصلنا قاعدين فيها يعنى!.