إفرجها يا باسط وإكرمنا يا ملهم

رجاء شخصى ، الفترة اللى جايه فترة صعبه عليا شخصياً ، دا أول تيرم ليا فى الكليه أكون فيه بجد وشادد حيلى بشكل باسطنى شخصياً . ( وإن كان الOutput بتاعى سئ جداً وغير مرضى بس الحمدلله )

خليكم عون وما تبقوش عوامل حفازة للنكد والإحباط اكتر ما هى مريحة معايا ، خليكم مبهجين حتى وإن كنت أنا شخصياً ثقب إسود بيمتص كل البهجة المرسومة على حياتكم السعيده.

حاول بعد الإمتحان ما تسألنيش ليه متضايق ، أنا هفضل متضايق لحد ما أتخرج ، تخيل معايا كدا علشان أتخرج بجيد بس أنا محتاج السنه دى واللى جايه أجيب جيد جداً واللى بعدها إمتياز -إن شاء الله- فلما أعك أقل عك دا بيخنقنى وبيضايقنى ، وما حدش يقولى بطل دلع علشان حرفياً دى كلمة بتحرق الدم أكتر من مالك أو إحكى فيك إيه .

آخر طلب ، إدعولى أخلص الكليه دى أسرع من البرق لإنى تعبت منها وحاجه كمان عايز أتخرج قبل أختى عيب نتخرج سوا أو بعدها ، إدعولى أخرج بجيد علشان ما أتكدرش فى حياتى ما بعد الكليه والمقبول يفضل يطاردنى حتى القبر. (أنا مقتنع إن الدرجات مالهاش علاقه وكل حاجه بس نفسياً عايز أجيب تقدير علشان الواحد زهق من المجهود اللى بيتشفط فى أرجاء الفضاء ومفيش تقدير بيطلع فى الشهادة )

يارب إنت عارف بكل القرف اللى بنتحط فيه وعارف قد إيه أنا بحاول وبتعب وعارف إنى ببذل مجهود قد إيه ، أنا عارف إن فيه جزء منى فقد الأمل فيك وعارف كويس إنى فقدت الإتصال بيك ، بس حرفياً اليأس متملك كل ركن ومفيش أى نور بينور فى أم العتمه اللى أنا فيها،كنت فاكر إنها التنس بس طلع إنه محتاج نفسيه وشخصيه بتاعة زمان ، أحمد اللى كان بيلعب رياضه بجد مش أحمد اللى بيفرغ طاقته فى التنس ، تفريغ الطاقه دا بيكون لما بتعرف تلعب مش لما بتكون لسه بتتعلم . يارب فكها من عندك ، أنا دلوقتى نفسى أجيب تقدير ، ماعرفش مفروض اعمل إيه علشان أجيب أم التقدير غير المذاكرة اللى بذاكرها وماجبتش درجة واحده حلوة ، ليك حكمة فى دا كله فهونها من عندك.

(للتوضيح : دفعتى بتتخرج السنادى وأنا لسه فى الكلية وفيهم صحاب المدرسة ،الموضوع دا مش مؤثر معايا جامد إلا فى فكرة إنى لسه فى أمها وكنت هخرج منها فى نفس الوقت ، أنا مقتنع إنى إتعلمت حاجات كتيره هم هيتعلموها فى وقت أطول ، وإنى عرفت ناس كتيرة نعمه وكنوز بس يبقى الشئ الموجع فى الموضوع إنى كنت هتخرج وأخرج من الكليه وكان دا الفاينال ما قبل الأخير ليا . )

مهتم بالتقدير لسبب شخصى وليس مستقبل والكلام المطحون فى مليون ألف فيلم عربى .