عن فقر الواقع

فيه شئ غير معروف بيحصل وبيخطط ليه من أيدى خارجية وأصابع بشوكها عماله تلعب فى كل حاجه حلوة بحاول أوصل ليها ، مفيش غير شئ واحد أو إثنين لسه ما خربوش مش محتاج أقول إنى مستنيهم يخربوا . ومن باب ذكر الأشياء الخربانه كلنا عارفين قد إيه حياتى الدراسية ماشية زى الفل ومجهودى المبذول بيطلع من الناحية التانيه درجات (بالسالب) وقد إيه أنا متفوق وشاطر جداً فى الكليه لدرجة إنى سقطت سنتين . ومما لا شك فيه إن الواحد محتاج يتكلم عن إيمانة ببعض الأشياء حابب أقول سيدى القارئ أنا إيمانى بإن هخرج من هندسة دا شئ مالوش عندى تعريف زى بالظبط لما تيجى تقولى ركز أو تقولى بطل تاخد الموضوع على صدرك ، الحاجات دى مش موجودة فى الكتيب اللى نازل بيه ، هو أنا دخلت الكليه علشان أفضل متكدر كدا وقاعد زى الثور اللى بيدور فى الساقية ، مهما عمل من مجهود وشد حيله هيفضل فى الساقيه دى ، ممكن يتطور ويروح لساقيه تانية ويبقى جنب أنثى تسليه وهو بيلف بس هيفضل بيلف فى نفس الدائرة المفرغه اللى مفيش منها أى فايدة ، يمكن هو بيعمل فايدة اللى أنا مش عارفها ولا عارف الفايدة من المثل دا بس اللى عارفه إنى بلف فى دايرة مفرغه واللى هى كل سنة جديده ببذل مجهود وبرضو بدخل الإمتحان ودرجاتى فى أعمال السنه غير دالة على إن دا نفس المجهود اللى بحطه فى التيرم ، أكيد مش كل المواد وأكيد مش كل الحاجات اللى بجيبها هى ظلم أنا اكيد بتدلع وبستعبط . لكن تكون أقل واحد فى أكثر مادة إنت فاهمها !! دا زى بالظبط شعور ماما لما تكسر ليها حاجه من النيش ، قلبها هينغز عليها وهيجيلها إنهيار عصبى لإنك كسرت الحاجه وإن مجهودها فى الحفاظ على الشئ دا راحت ، نسيبنا من ماما دلوقتى ونخلينا فى الوكسة اللى أنا فيها دى .

تانى حاجه حابب أتكلم عن الأشخاص اللى بتنوح طول الوقت ، هيطلع حد من الجمهور يقولى إنه "شوف مين بيتكلم" وكلام من هذا القبيل حابب أرد عليه وأقول روح ربى عيالك يا حيليتها ، نواح عن نفسك فى نفسك ولا يمس الأشخاص المحيطين شئ وكونك عيل لزق قمئ ناشر للطاقة السلبيه اللى فيك ولو بشكل نواح وإنك هتسقط وتطلع بتقفل وتجيب درجات اللى حوليك مش بيجيبوها شئ تانى . يعنى لما تقول هشيل السنه تبقى ضايع واقع لكن مش كدا !! مثلوا عدل أو إعقلوا الكلام اللى بتقولوه طالما إنتم مش قد اللى بتقولوه!! 

أخيراً وليس آخراً اللهم خدنى من البلد دى على بلد تانية أنظف وعيشنى عيشة نظيفه زى اللى كنت عايشها فى قطر وأحسن ، الله يهدينى للى يخلينى أسافر فى أسرع وقت ويخلينى أعيش مبسوط وقادر أعمل حاجه ليا ولغيرى بدل ما أنا لا عارف أشوف نفسى ولا حتى أكون مع غيرى ، اللهم هجرة أو إصلاح الخراء اللى أنا فيه دا ولمبة نيون أبيض (ما بحبش اللمبة الصفراء لو سمحت ) تنور العتمة المطينة اللى وقعت فيها دى لو سمحت .