إلى المرحوم رينا

عزيزى المرحوم رينا..

بعد التفكير الطويل تحت الدش قررت أكتبلك، السبب غير واضح ولكن من الواضح إنك واحشنى يابنالصرمة!! ودى أول مرة أحس إن فيه حاجة أو حد واحشنى قد ما وحشنى شكلك وخلقتك ولون عينيك وصوت النونوة بتاعك المنسون دا !! وحشنى ملمس شعرك الغريب ، لا هو زى شعر لولو ولا هو زى شعر بندق ، أى نعم ما عرفتش أخلى شبيهك عندنا بس مفروض إنه فى أيدٍ أمينه وما تقلش على الجمله يا بن الرخمه .

صحيح بندق اتجوز أمك تانى وأهى حامل للمرة التالته الوليه ما بتهمدش ، انت عارف صنف الحريم يا رينا مفيش منهم فايده وما بيحبوش إلا وجع القلب والصداع ، بس انت أكتر واحد عارف إننا محتاجين ليهم ومت عشان ما اتجوزتش، حقك عليا صحيح نسيت أقولك معلش، ماكنتش عارف إن الموضوع حيوى كدا! *إيمو بيعيط من الضحك* . خلينى أقولك ان فايتك تطورات رهيبه فى البيت يا عم رينا، تخيل دقدق اللى كان بياكلك كل علقة والتانيه دلوقتى بقى المسيطر فى البيت والحنيه بتفط من عينيه بعد ما كان المنبوذ المهمش ، مانت ناصح كنت ، بتعرف من أين تؤكل الذراع يا واطى. بندق أخلاقه ألطف منك يا رمة الرمم.


فى نهاية الرساله ، وصلت لملخص إنى لما أدخل الجنه هطلب من ربنا إنك تيجى تسكن معايا فى القصر بتاعى فى الجنه عشان أكدرك كل شوية ، وعلى حسب علمى إنك هتاخد حقك منى يوم القيامة والتنطيط والحدف والبهدلة اللى كنت بعملها فيك، خليك كويس وما تاخدش كل حقك و وعد هعيشك معايا فى القصر وهجيبلك قطط قد كدا تتجوزهم وتعيش معاهم وأهو قطط الجنه أحسن مليون مرة من أمك اللى كنت عايز تتجوزها يا معفن .

من من كدرك وكنت بتخاف منه

أنا