يا مسافر وحدك .. ما كفايه شحتفه

-
آخرة المعافرة والجرى دا بتكون إنك تنول مرادك ، بس دا مش فى كل الحالات يافندم,حضرتك هتجرى وتفضل تجرى كدا لحد ما تيجى فى الآخر وتسقط برضك. كون الكلية مسيطرة على الجزء الأكبر من حياتى وكونى بعافر وبخسر قصادها فى المرة الاولى وبكسب فى التانية دا شئ بيخلينى أفضل قاعد حبة حلوين على ما أبدأ أتحرك أعمل اللى يرضى ضميرى لو لا قدر الله سقطت السنه الجاية، السنه الجاية بقى هيكون دفعة 16 بتتخرج وأنا معرفش مكانى فين من الإعراب وسط الدفعات.


أوكاى ليتس تالك أبوت حاجة مكدرانى ، عارف إنك ليك حكمة فى كل اللى بتعمله وبتحطنى فيه، المثير للسؤال هل أنا مسير ولا مخير فى كل اللى بيحصلى ؟ يعنى بقالى 3 سنين بذاكر كويس فى كتير من الحاجات والجزء اللى بتدلع فيه ما يؤديش بيا إنى أفضل محشور فى الموقف الحياتى دا أبداً . يعنى أتعب وأعمل اللى أقدر عليه وهفلح المرادى ولا هو أنت مختارلى أفضل قاعد السنادى وأكمل مسيرة إنها مش بتظبط معايا من أول مرة ؟ طب طالما أنا مش مخير ومسير مدينى ليه إمكانية التفكير والسعى والجرى طالما أنا هعيش على خطتك اللى شايفهالى مناسبة جداً وجميله؟ يعنى أكيد أنت أعلم وأدرى منى بكتير إكمنك خلقت الكون دا كله وعارف كل صغيره وكبيرة فيه زى ما المخابرات والأمن الوطنى بيعرفوا أقل وأكبر تفصيله عن حياة كل مواطن فى بلده، فين بقى الصبر وشوية الأدله الصغيرة اللى بتهون على الواحد طريقه ؟ ما تقوليش اللى بيحصل دلوقتى عشان إحنا وأنت عارفين إن الحاجة الحلوة 
دى محتاجة منى أكون ناجح وشاطر وكويس الفترة الجاية عشان تكمل وأكون حقيقى بحقق اللى نفسنا فيه، أى نعم دى حاجة أنا مخير فيها بشكل جزئى بس غالباً هكون مسير فى مرحلة من المراحل اللى خايفين منها فى الكام سنه الجايين .



أنا عندى مناسبة مهمه الفترة بعد الإمتحانات ومحتاج أعمل حاجات كتيرة عشان أروح بالمنظر اللى أنا عايزه ومش منهم إنى أحلق شعرى. ياريت ما يحصلش أى ظرف يخلينى أحلقه. عارف إنه شكله مقزز لكتير وعارف كويس جداً إنهم مش بيحبوه ولا صحابى عاجبهم منظره بس من إمتى بهتم بالحاجات الصغيرة دى ؟ بحب شعرى جداً وبعتبره حاجة من الحاجات اللى ما تخصش الغير زى ما بنقول إنه ميخصش الناس حاجات كتيره بيحشروا منخيرهم فيها.



طيب يارب حاجة كمان ، لما إحنا  بنقرر نبعد عن الناس لفترة عشان إحنا تعبانين ومش قادرين نتعامل غير مع قلة كدا لاقيين راحتنا معاهم وشوية عشان المذاكرة والإمتحانات، ليه الموضوع بيتفهم إننا بنتخلى عنهم وبيتفهم إننا أندال وبيقفشوا وبياخدوا جنب مننا إكمننا عملنا جريمة وغلطنا جامد فى حقهم، إيه مالناش حق ناخد جنب وننعزل فى الركن البعيد الهادئ؟ (لأ يا بارد ومش فى نفس المكان فى النادى ولا كانت قاعدة مستنياه ).


حابب أوجه شكر خاص لمخترع ال Knee support وقد إيه بتخفف ألم شنيع ، قد إيه شعور مُهين لما تبقى زى ماما اللى عندها 55 سنه وهى بتقول آه من ألم ركبتها بقيت زيها وبقيت مش بتقدر تسجد وحالتك الجسدية صعبه. بس على الجانب الآخر الشئ دا حب عميق دفين . 


بمناسبة إنى قربت أبدأ أخلص ال22 سنه وأدخل فى ال 23 حابب أكافئ نفسى إنى مانتحرتش لحد دلوقتى وأشتريلها فرشة الاسنان Oral - B اللى ب 200 جنيه بدل ما بعور لثتى فى كل مرة بغسل فيها سنانى اللى بتقع :$ ، وأجيب السلسلة إياها ، ولو فضلت كويس فى رمضان وما دخلتش عملت العملية هروح يوم إسكندرية أفطر وسط المسيحين *وجه منشكح* ، طبعاً كلنا عارفيين فرص إنى ألاقى فتيات أحلامى وسطهم هناك أعلى بكتير من المسلمين . -آه فتيات أحلامى مش فتاه واحدة، شكراً للإسلام اللى خلانى نتجوز4 - *سجدة شكر*.

معنديش طقس مقدس لعيدميلادى غير إنى أكون مكتئب جداً ومش عايز حد من الكليه يعملى سيربرايز بارتى ولا يجيبولى كيكه ولا حد يقولى كل سنه وأنت طيب ، ولا حد يجيبلى هدية... لأ معلش أنا بحب الهدايا جداً وبحب التذكار المادى ولو كان حظاظة أو حتى قلم شكله حلو ، أنا بحب الحاجات دى جداً . هيكون آخر يوم إمتحانات. يعنى بعد 23 يوم إلا 4 ساعات كدا.



أخيراً إسمعوا الأغنيه دى بعد ما مسار إجبارى صححوا الهراء اللى أحمد مكى عمله فى أغنية (ميه ميه كانت هتفرق فى الوداع)

تعليقات

إرسال تعليق

المشاركات الشائعة من هذه المدونة

فقط، استمتع.

-
"لا تدري لعل الله يحدث بعد ذلك أمراً" من أكثر الأشياء عبثيه أنك لا تدري وماذا بعد، هل هناك فرج؟ هل ستسوء كل الأمور لتنهض من الركام من جديد؟ لا شئ أكيد، أنت فقط تستمر في العمل، في الكفاح، وتأمل أن كل شئ سينتهي أو "هناك احتمال آخر لتتويج مسعانا بغير الهزيمة، ما دمنا قررنا أننا لن نموت قبل أن نحاول أن نحيا" وإن غداً لناظره لقريب، لا حتمي، لا شئ يستمر، لا شئ سيدوم. هذا ينطبق على كل ما نخاف وكل ما نستمتع به من أشياء جميله. لماذا إذاً القلق؟ لماذا التفكير الزائد؟ لا شئ أكيد، ولكن العقل واحد من النعم والنقم التي لا تستطيع أن تتمالك كل ما يقوم به، بعض الأشياء تحدث دون درايه، والقليل الكثير الذي يمكنك أن تفعله أن تهدئ من روعك، أن تتذكر أن ما تريده/تخاف منه سيزول وستأتي الأيام لتثبت لك أن كل ما تفكر فيه يحتوي على كثير من المتغيرات التي لا سلطة لك عليها.
قراءة المزيد

الجنوبي - الإهداء

-
 من قراءة "وأنت السبب يابا" أدركت شيئاً لم أكن قد وضعت له أسماً، أنا أحب التواجد في وسط زحام من البشر، ولكني لا أريد منهم أن يطلبوا مني التفاعل معهم والرد عليهم. كانت هذه من صفات عم نجم، أنه يستيقظ صباحاً وفي حالةٍ نفسيه للكتابة، يفضل أن يبقى صامتاً دون توجيه الكلام إليه وانتظار الرد، أظن أن هذه من الصفات التي أمتلك ولا يقدرها أي فرد من المحيطين لي في المنزل. في جلستي الأخيرة طلبت مني طبيبتي أن أكتب لأنني لا أخرج ما يدور في حياتي إلا في الكتابة، وكان ردي عليها أنني أكتب حينما أقرأ، دون ذلك لا أجد الطاقة أو الرغبة للكتابة. وأثناء بحثي عن صفات مرضي النفسي، وجدت أنني قد أدخل في حالةٍ نفسيه، تجعلني شرهاً للقراءة وهذا ما حدث لي في فبراير، قرأت عدداً لا بأس به من الروايات ثم بعد ذلك نضبت رغبة القراءة، وكان لا بد من تحفيزي للعودة لها بشراء كتابٍ جديد، فقط عندما يحدث هذا، أحياناً استعيد رغبتي للقراءة مرة أخرى واستعارة بعض الكتب من الأصدقاء. زيارتي لبيت الصديقة لُبنى، أهدتني الجنوبي، وهي سيرة ذاتية لزوجة أمل دنقل، تعلم صديقتي كم أحب أمل، وكيف أن هذا الكتاب من الكتب التي كنت سأقتني، طل...
قراءة المزيد

الصمت كالسوس

-
الألم، هو أحد أكثر الأشياء المحفزة للكائنات الحية!. حينما نشعر بألم في جسدنا نحاول بطريقةٍ ما أن نخفف هذا الألم او أن نبحث عن اصل المشكلة ونعالجها، لكن ما أنا بصدده الآن ليس ألماً جسدياً، نعم إنه النوع الذي ﻻ تعلم من أين جاء، وﻻ كيف تتخلص منه، زائرٌ ثقيل الدم ﻻ يستحي أن يدمر كل ما يقف في طريقه لكي يستقر هو ويسيطر على جميع حواسك وتفقد القدره على الشعور بشئ سوى هو، الألم. يعتقد البعض ان كل شئٍ يمكن تداركه، أو على الأقل التخلص من ضرره، ولكن الألم النفسي ليس بهذه السهوله. لست بالمتخصص في الطب كي اسرد مدى صعوبة الأمر، ولكني أحد ضحاياه، استطيع أن اتحدث من الزاوية التي امتلك من الأمر وهي التجربه الفعليه. اعتقد أن اسوأ ما قد يمُر علىَّ في يومي هو عجزي عن التحدث عن ما امر به، سواءً كانت موجة حزن أو أحد نوبات الهلع المفاجئة الحدوث دون سابق إنذار. لا يعلم الكثير عن كيفية تحديد نوع الألم الذي يمرون به الآن، ولكني اصبحت إلى حدٍ ما ذا خبرة في مثل هذا الأمر، فحينما اتألم من جرح أحد العمليات دون حدوث أي حركه عنيفه اطمئن نفسي أن كل شئ على ما يرام، وألعن جسدي الذي ينوي أن يشن حرباً هوجاء ويعلن ...
قراءة المزيد