افرجها يا عليم

التدوينة دى مش مهمة ومش لازم تقرأها ومش لازم تسأل ليه نزلتها، أنت مال أهلك؟

فاضل على الامتحان أقل من اسبوع وبدأت حالة من المشاكل غير طبيعية ، خلاص أهلى قرروا إنه هيعيدوا تربيتى وخلاص مينفعش نفضل ساكتين على اللى بيحصل دا كله، شايفين إنى منحرف كافر عربيد فاشل مفيش أمل منى ، فقرروا يعملوا اعادة ظبط المصنع ويرجعونى إلى الطريق السليم الصحيح عشان أنا كدا ضليت وبقيت فاسق وفاجر. للأسف محدش بيتخيل حجم المأساة غير صاحبها، فى الواقع أهلى (هنا مش مقصود بيها البيت بس لأ دول الأقارب درجة أولى وثانية ) Classic حبة حلوين وكدا، مش بيحبوا أى جديد ولا بيتفقوا مع أى مختلف عما تعودوا عليه وشافوا، و ياما جربت حاجات عكس رغبتهم وكانوا غير راضيين عنها، كصحاب فى المدرسة ونخرج ونشوف بعض فى الأجازة ومينفعش ، وصحابك دول سبب فشلك وهيخلوك هتفضل فاشل مش بتجيب مجموع ( دا بسبب إنى كنت جاى من قطر أقل مجموع جبته فى سنة 6 ابتدائى والقوا باللوم على صياعتى عشان مثلت مسرح وكنت مش بسمع كلامهم ، مع إنها كانت أول سنة اخرج برا نطاق الدراسة واعمل حاجة جنبها وكنت مبسوط بيها جداً ونفسى ارجع امثل بس دى نقطة ما علينا منها دلوقتى على الإطلاق) وحش و إيه 88% دى ، كنت داخل ثانوية عامة وكلهم متوقعين أكون فاشل ومش هجيب مجموع عشان صحابى اللى متصاحب عليهم و إن أحمد صلاح دا شاطر وهيضيعك، مفيش إن الشاطر بيشد صاحبه وبيكون مشجع لأ كل الناس عندهم بقرون وماسكة شوكة ولونهم أحمر وبيعملوا بيبى فى بق الناس أما بتتاوب ، المهم فى ثانية ثانوى جبت مجموع صدمهم وثالثة قليت بس فضل الشك فى البيت هنا قائم ومرفوع الراية بإنه مش هيدخل هندسة دا مش وش واحد يدخل هندسة، دارت الأيام ودخلت هندسة وبقيت فى الكلية، خلاص بقى كدا أنا تخطيت الاختبار وبقيت فى هندسة، شوية ثقة بقى، لأ دخلنا فى مرحلة إنى شيلت مادة فى أول تيرم وحصلت شوية مشاكل عندى ( عندى لإنى منفصل تماماً عن أهلى ومحدش يعرف عنى حاجة لإننا متعودناش نكون قريبين من بعض أصلاً ولا نكون كما الابن وأهله سواء أم أو أب) و زاد من الأمر طينةً كانوا هم من الحاجات الجميلة اللى ركز ذاكر أنت كدا هاتسقط و نفضل فى موضوع السقوط لحد ما فعلاً سقطت، هنا كانت القشة التى قسمت ظهر البعير، هنا اكتشفت إنهم باين والله أعلم كان فيه نبؤة إن أول ما اسقط لازم يفقدوا فيا الثقة لإنه خلاص كدا دى نهاية الكوكب، ونربط أى حاجة بالسقوط وركز فى الكلية ومينفعش تعمل كذا وهكذا يا جماعة الخير، بدأنا نتحرك فى محيط من الهراء نحو إن الحياة تتوقف ونشوف الكلية وبلاش اكتيفيتى وبلاش خروج وبلاش نزول وهكذا. يذكر إن اعدادى كان يستحق إنى اسقط ومكانش ينفع انجح لإنى حقيقى كنت بتدلع بشكل بشع، أى نعم فيه ناس كانت ابشع منى وجابت تقدير بس المقارنة شئ غير مقبول بالنسبة ليا وشئ غير عادل بالمرة. 

بدأت حكاية السقوط وبدأنا فقدان ثقة تدريجياً حتى صارت عمياء وكل سنة فى سنتين وأنت مش بتعمل حاجة والاسطوانة المشروخة اللى أنت عارفها و حافظها عن ظهر قلب زى سورة الفاتحة كدا، بنستهل بيها أى حاجة ممكن تطرأ على بالك يعنى اشتريت حاجة بس كانت غالية فنفضل فى مواضيع لحد ما نوصل للكلية والفشل ، ممكن الموضوع يوصل لرغيف عيش ملزوق فى بعضه فدا يدل على إنى بنى آدم غير مسؤول كمان فى رغيف العيش زى مانا مش مسؤول عن علاقتى بالكلية.

حالياً الوضع اختلف، بقيت فى الكلية ودفعتى اتخرجت وبقينا بنقول ياللا يا أحمد شد حيلك اتخرج عشان صحابك وكدا، زى ما يكون قاعد فى الكلية وحابب القعدة فيها يا جماعة عشان البيسين اللى هناك ، والبنات القالعة ملط اللى أنا اعرفها وبخرج معاها وبسهر وغالباً فى الfantasy بتاعهم متجوز عرفى لإنى نسيت اقولكم كفرت وصبأت عن الملة، ولا أكون مثلاً حابب الكلية فقررت أخذ السنة فى سنتين واتمتع بالعرض الجميل من البنك البيتى ومصروف شهرى وأكل وشرب ورايح الكلية أخلص كل سنة فى اثنين حد لاقى شغل ؟، بعيداً عن السخرية يعنى هم حالياً الموضوع بدأ يبظ منهم وهنبدأ مرحلة إننا نروض الكلب المسعور الهيجان الفاشل المنحل الغير مؤدب المنفلت عن الدين والعادات والتقاليد وكل ما نص عليه الكتاب والسنة. مبقيناش عاديين عايشين مع بعض والجزء الأكبر من الكلام دا أنا السبب فيه وعارف إنى كنت سبب بداية البعد ، لكن لما تلاقى الطرف اللى قدامك مش فاهمك مهما حاولت وعندك عنه -ve feed back  بيجيلك نفور وحالتك بتكون لأ دول أول حاجة نبعد عنها.

أهلى مقتنعين إنى أعرف ناس والناس الكتيرة دى هى سبب فشلى جنب إنى أصلاً فاشل ( حاجة كدا طينة على الطينة) ، لو يعرفوا الحقيقة ويعرفوا إن أغلب اللى بيكون حولينا من جيلنا ما هم إلا مجرد معارف أغلبها سطحية بس احنا جيل بيعرف يسجل لحظات اكتر منهم وبيعرف يتواصل عشان وسائل التواصل بقيت اسهل واسرع وارخص مما يتخيلوا ، ممكن الواحد ميكونش عارف قيمة التواصل القديم بتاعهم وكان بيتمنى يكون عنده الرسائل والجوابات بين صحابه ومكالمة تيليفون والناس توحشك بس دا جيلنا ، أنتم عاوزين تمنعوا عنا الموضوع دا زى ما حد فيكم عامل كدا مع بناته والموضوع يحترم الحقيقة !! مش عارف مينفعش بعد ما تدى مصاص الدماء شوية دم بينسوه هم إنه اتحول تمنع عنه الدم ، هيمص فى نفسه لو فرضنا إنه لسه فريش فى الكار. 

أما قعدت شوية مع أهلى اكتشفت إن السقوط مش حاجة جديدة عليهم بالعكس كل شخص منهم سقط سنة على الأقل فى الكلية والموضوع مهواش حاجة لسه أول مرة يشوفوها، معرفش ليه مستغربين إن ممكن حد فعلاً يكون خلاص زهق وكفر من الكلية؟ يعنى فين الجديد عليكم؟ 

لو جينا عليا، للأسف لسه بحاول ولسه بعافر ومعرفش ليه، امبارح كتبت البوست اللعين اللى كنت بدعى فيه اعدى عشان اكتر سنة تعبت فيها وكانت اكتر سنة سيئة فى النتيجة وكانت اسوء نتيجة عدت عليا فى كل حياتى على قد ما تعبت فيها، يمكن حالة اللاوعى اللى فيها بسبب إنى تعبت أو لأ برضك بفشل ومش بحقق أى انجاز؟ معنديش فكرة ومعنديش أى جزء من العقل بيقنعنى اروح لدكتور نفسانى يريحنى من اللى فيا والحاجات الكتيرة اللى بتورد عليا من أفكار انتحاريه أو حتى شوية افكار مجنونة، بيكون لسه فيا عقل اتحكم فيهم واتمتع بشوية منهم وما اكتمش حاجة عشان مفيش مكان لكتمان تانى، وصلت لمرحلة من البرود تجاه الكلية وكم الحاجات السيئة اللى بيحصل ليا كبير ومش قليل بس بقيت بسطح، بقيت مش بحب الكلية ولا بحب دخول القاعة ولا بحب أى حاجة ليها علاقة بالكلية. كان ذكر فى احد المرات اللى تم الكلام فيها إنى هفشل لو رحت أى كلية تانية عشان أنا نزلت من على الهاوية وفجرت والكلام اللى قلته فوق ، بس للأسف لو حتى عرضوا عليا كلية تانية انا عاوز اتخرج من الكلية دى مهما حصل عشان انا شاطر وكويس ومفيش حاجة اسمها اسيب الكلية عشان سقطت، مع إنى لو سيبت الكلية بأقل مجهود فى أى مكان عشان نفسيتى هاتتحسن هاجيب تقدير وانجح بس حتى ولو مش هيحصل الكلام دا، يمكن مقولة إن " الساقط فى بلد ترتيبها فى التعليم ما قبل الأخيرة مش حاجة وحشة" بس المقولة دى تتحقق لو واحد مش عارف يمشى او اختيار الكلية كان اجبار عليه.

فى الواقع بعيداً عن أى شئ محدش فينا كامل ومحدش فينا على الصراط المستقيم وكل واحد فينا ملهى فى دنيته وذنوبه ومعاصيه وكل واحد عارف هو بيعمل إيه ، من حقك تنصحنى ومن حقى انصحك ولكن ليس من حقى اجبرك ولا تجبرنى على حاجة او تهددنى بقطع علاقتك بيا عشان انصاع لما تأمرنى بيه حضرتك. كونا مختلفين عن بعض ميمنعش إننا نكون كويسين مع بعض، لو افترضنا إنى كافر فدا لا يعطى الحق لحد إنه يتعامل معاك بشكل يهينك ويقلل من قيمتك ، دينك وما تفعل لربك والناس ليها الظاهر، إن كنا بننصح عشان نوعى ونفوق اللى بنحبهم بس الموضوع بيكون بشكل أحسن ، مش بعد ما زرعنا فيهم النفور من اهاليهم وكره إنهم يقربوا من الناس اللى هاتحكم عليهم بإنهم وحشين ومش كويسين مهما عملوا ولا بيسمعوا ليهم و من صغرهم أى حاجة تتطلب بتكون لأ عشان الدراسة، زى ما يكون الدراسة دى هى القرآن اللى مفروض نحفظه عشان ندخل الجنة، ولما بتحاول تخرج عن نطاق النمطية والstereotyping بيكون مصيرك النفى والهجران والقطيعة والتهديد بكدا لو ما اتعملش كدا، فقدان الثقة بيخليك تتجنب تتكلم أو تصارح الناس بالحاجة وبتخليك تيجى على نفسك كتير، مشكلة أهالينا لما دخلت السوشيال ميديا إنها فهمت الموضوع بشكل غلط جداً وفهمت إن الهلس دا بجد وإن أى حاجة بتتكتب خلاص لازم نتحاسب عليها ، فهمت إن السوشيال ميديا مكان لازم نكون فيه بجد ، احنا بنضيع عمرنا عليها ومحتاجين نرفه عن نفسنا ، السوشيال ميديا خدت مننا حاجات كتيرة وضيعت مننا وقت كبير وسبب من اسباب إننا مكتئبين ، بس احنا لو بنعمل حاجة تانية تساعدنا غيرها مكناش لجئنا للسوشيال ميديا، لو فكرنا نعمل أى حاجة هيكون فيه اعتراض بشع عليها عشان تركز فى الكلية يا سلام الموبايل قريب وسهل اتدفن فيه ومحدش هيعرف يمنعنى عنه ولو فكرت فيه ألف وسيلة اهرب بيها منكم وبعيد عنكم.  

نفسى أوصل ليهم فكرة إن اللى صحابه كتير وحيد ومالوش حد قريب منه، و إن الجدعنة مع الناس حاجة مينفعش تتعاب بالعكس دى حاجة كويسة، ومينفعش نعيش بنى أدمين مصلحة ولازم يكون لينا صحاب نكلمهم ونسأل عليهم ونعيش معاهم ميكونش كل كلامنا فى مجال ضيق سخيف هيوصل بينا الحال إننا بنشوف بعض فى المناسبات وممكن تنقطع العلاقة بينا عشان خلاص مفيش مصلحة، أغلب المعارف بتؤول لكدا مع مرور الوقت واختلاف الأوضاع واللى بيتجوز وكدا ، بس ليه منكونش لينا ذكريات كويسة مع الناس اللى حولينا ؟ يمكن هيقولوا انجح واتخرج ، يمكن هيقولوا كلام بشع كتير مالوش لازمة بس مبقاش عندى طاقة ارد بيها أو اتكلم فى الموضوع دا، يمكن الحاجة الوحيدة اللى هم مش عارفينها هتكون سبب فى مشكلة أكبر وتحوير فى هراء مالوش لازمة بس عملت كدا عشان اريح دماغى منهم لإنهم مُحبطين مقرفين ومش بيساعدوا على أى حاجة غير إنك تزيد كرهاً لنفسك وما تثقش فى أى حاجة تخصك.

الموضوع كان ممكن يخلص بكل سهولة و اعمل block  ليهم كلهم ومحدش فيهم يعرف يوصل ليا ولا يشوف حاجة من اللى بينزل او بعمله ، بس انا مش بعمل حاجة غلط من وجهة نظرى ، ولو هم شايفين إنها غلط مش بخبى ولا بدارى حاجة ، الموضوع دا لو اتعمل كان ممكن يريحنى من هم كتير ، بس طالما حاجة مش مقتنع بيها ما بعملهاش.

أخيراً الكلام دا ممكن يتقرأ منهم وممكن الموضوع يزيد تصعيداً بس الموضوع مبقاش فيه حلول، جيل غير الجيل ، وأنا فاشل ومعنديش مشكلة اعترف بيها بس بحاول مكونش كدا وبحاول اخرج من حالتى النفسية السيئة بسبب الكلية وبسببكم واخرج من نطاق مجالكم المغناطيسى اللى عاوزين تشدونى ليه، مفيش حاجة تجبرنى أكون زيكم.