اليوم الخامس
يمكن من الأشياء الجميلة فى السنة الجديدة لحد اللحظة دى هى نعمة الصحاب، يمكن لحد اللحظة دى حظى في الدراسة ليس بالجيد ويمكن ربنا كرمنى لما حبيت اشتغل أنى فضلت اتدرج لحد ما وصلت لأني آخد مبالغ كبيرة كدا، لكن النعمة الحقيقية اللى معرفش استمرارها لحد دلوقتى ماشى إزاى هى نعمة الصحاب والناس اللى حوليا، ربنا يكرمنى ويقدرنى أصون الغالى منهم واللى باقين على وجودى فى حياتهم.
كنت متخيل أني شخص متزن وغير مُشَوَه ولكنى اكتشفت مؤخراً أنى شخص ملئ بالعيوب، ومشكلة من مشاكلى أنى شخص بيتعلق بالناس اللى بتكون قريبة منه جداً لدرجة أن فقدان أى شخص منهم بيسبب ليا حالة من الإكتئاب الطويل، لأن أى شخص دخل في حياتى هو شخص مهم جداً، هو عيلتى اللى بكونها، للأسف دا شئ غلط نسبياً.
----
لا يوجد عندى حاجة اسمها عائلة، عيلتى هى صحابى المقربين منى، هم الناس اللى بحبها وبيعرفوا عنى تفاصيل حياتى، المشكلة كلها أنى بكون شخص على طبيعتى معهم فقط، غير كدا بكون مُقَنَع ومفيش شئ من اللى بيحصل أو بيتقال يكاد يكون أنا.
بالتالى أى فقد في شخص عزيز عليا يمثل ليا شئ كارثى كما سبق ذكره.
----
من اللقطات اللطيفة النهاردة أن مريم محمد كلمتنى لمجرد أنها تطمن عليا، وقعدت ترغى شوية معايا عشان بس تشوف أحوالى وأخبارى، وكان من الأخبار السعيدة أنها رجعت تعزف عالبيانو وحاجة من الحلويات اللى قد اسمعها عن شخص، أنه يرجع يمارس هواية أو شئ له علاقة بالفن عموماً.
----
فيه محاولات مستميتة لإصلاح ما يمكن إصلاحه من علاقاتى المُتلفة، أدركت أخيراً أنى قد ارتكبت الكثير من الأشياء البشعة فى حق الناس، وأنى اصبحت شخص غير متزن، يمكن من الحاجات النادرة اللى حصلت أنى اعتذر بشكل متكرر عن هذه الأفعال، قد يكون من الصعب أن شخص يقولك " صعب التعامل معك وأنت غير متزن" يمكن دى حاجة الحقيقة تضايق وتزعل فشخ، يمكن من الحاجات اللى مبقدرش استوعبها أن عدم اتزانك دا يكون سبب من أسباب النفور منك، يعنى المفترض أننا على الحلوة والمُرة، ولا إيه؟ ولكن يكاد يكون من الأشياء التى تغفر لصاحب الجملة ما قال أنى بكون شخص بشع جداً وبطيح فى المقربين منى لما بكون غير متزن.
----
أخيراً وليس آخراً، دى محصلة رحلتى حتى الآن..
----
السنة دى هاتكون مثمرة سعيدة إلى حدٍ ما - إن شاء الله -
تعليقات
إرسال تعليق