تناقضات متناثرة

للأسف الفترة الحاليه هي فترة التعرف على كمية الحاجات اللي كنت بعملها زمان وكنت بضر نفسي بيها. يمكن من الحاجات المؤلمة أكثر هي أني اكتشف أني لسه بعمل حاجات بتسبب ليا ضرر كبير في الوقت الحرج اللي أنا فيه دلوقتي. فقدت قدرتي على تحمل البني آدمين نتيجةً لكل اللي فات، مبقاش عندي الصبر على تحمل أي شخص غير قله قليلة جداً. ﻷول مرة من يوم ما عملت فيسبوك اقفله وأكون بعمل كدا وانا نفسياً بتحسن، ميبقاش السبب في أني بحاول انعزل واكتأب أكثر، أنا مكتأب فعلاً بس قفلت السوشيال ميديا ﻷنها فعلاً بتستهلك من طاقتي ووقتي بشكل غير طبيعي. لما جيت أبص على الstates بتاعة قد إيه بمسك الموبايل في الموبايل لقيت أني بضيع 8 ساعات على الموبايل واغلبهم في الفراغ مفيش حاجه واحدة بعملها مفيدة. بس من أسبوعين قررت أني أقلل كل السوشيال ميديا، بمعنى أني مبقاش عندي أي فتحه على الكوكب الافتراضي غير الواتساب. يمكن الموضوع بيزيد من وحدتي ومن أني اشوف حقيقي من هم الناس اللي فعلاً هاتكون موجودة. يمكن الحقيقة هي أني كلمت أشخاص معينه هاتقدر تتحمل تشوف جزء من السواد والكآبة المخيمة على المكان، بقيت عارف تماماً أن فيه أصدقاء ﻻ تس...

للأسف أنا غضبان من حالي من أمس، حصل أني اكتشفت أني بعيد نفس الدوامة اللي بعملها كل سنه في الامتحانات وأن كل حاجه ماشيه بالظبط زي ما كنت بعمل كل سنه ومفيش حاجه واحدة اتغيرت غير أني بقيت مدرك لكل دا وأني فيه شوية حاجات صغيرة حسنتها في الأداء المزري اللي بعمله كل سنه. غضبان من نفسي أني بكرر نفس السيناريو مع أني مدرك تماماً ﻷنه سيناريو هايطول عيشتي في الكلية وهايخليني أكمل فيها أكثر من المحتمل وهاقعد فيها مدة أطول بكثير. غضبان أني معنديش حد يقدر يقرأني غير الدكتور النفسي، أني بعرف بشكل كبير اقرأ الناس بس محدش بيعرف يقرأني. يمكن بعرف اداري كل المعطيات اللي تخلي اللي قدامي يقدر يقرأني بس إسلام بيقدر يقرأني وساعدني أفهم. معنديش الطاقة أني اشارك غيري بخراء دماغي، معنديش السماحية أني اظهر ضعيف أو فاشل من ثاني قصاد الناس، بس قصاد نفسي أنا فعلياً ورقه. أتمنى المرحلة الجاية اقدر اصلح وارمم الخراء اللي وصلت نفسي له واقدر اخرج من الوضع الحرج دا بأقل الخسائر.