في رثاء عزيزةٍ

للأسف الفترة الحاليه هي فترة التعرف على كمية الحاجات اللي كنت بعملها زمان وكنت بضر نفسي بيها. يمكن من الحاجات المؤلمة أكثر هي أني اكتشف أني لسه بعمل حاجات بتسبب ليا ضرر كبير في الوقت الحرج اللي أنا فيه دلوقتي. فقدت قدرتي على تحمل البني آدمين نتيجةً لكل اللي فات، مبقاش عندي الصبر على تحمل أي شخص غير قله قليلة جداً. ﻷول مرة من يوم ما عملت فيسبوك اقفله وأكون بعمل كدا وانا نفسياً بتحسن، ميبقاش السبب في أني بحاول انعزل واكتأب أكثر، أنا مكتأب فعلاً بس قفلت السوشيال ميديا ﻷنها فعلاً بتستهلك من طاقتي ووقتي بشكل غير طبيعي. لما جيت أبص على الstates بتاعة قد إيه بمسك الموبايل في الموبايل لقيت أني بضيع 8 ساعات على الموبايل واغلبهم في الفراغ مفيش حاجه واحدة بعملها مفيدة.

بس من أسبوعين قررت أني أقلل كل السوشيال ميديا، بمعنى أني مبقاش عندي أي فتحه على الكوكب الافتراضي غير الواتساب. يمكن الموضوع بيزيد من وحدتي ومن أني اشوف حقيقي من هم الناس اللي فعلاً هاتكون موجودة. يمكن الحقيقة هي أني كلمت أشخاص معينه هاتقدر تتحمل تشوف جزء من السواد والكآبة المخيمة على المكان، بقيت عارف تماماً أن فيه أصدقاء ﻻ تستطيع أن تتحمل كم السواد اللي بيكون موجود وأنهم يسمعوا مني، بس لو في يوم كان عندي احتياج لهم بلاقيهم بدون تأخير.

Quora حالياً هو الملجأ اللي بقعد عليه بقرأ حاجات كثيره. بكتشف قد إيه أني متأخر في المجال اللي بذاكره وبكتشف أني حقيقي مبقاش عندي رفاهية الدلع والخروج والسفر والفسح، دائماً بستغل تجمع الشله المقربه مني عند محمود وبلغي أي حاجه ثانيه لمجرد أني اعرف اشوف الناس دي كلها وفي نفس الوقت مبقاش بضيع وقت كبير في أني بخرج. بقيت حاسس أني كل دقيقة بعمل فيها حاجه غير المذاكرة والقراءة هي فعلاً علوقية وعدم تحمل مسؤولية الوضع الحالي اللي حطيت نفسي فيه بسبب اختياراتي.

طول وقت مذاكرتي النهاردة كل اللي بفكر فيه أني لو وصلت لسن 30 وما تخلصتش من الكلية وكنت بدأت career شغل ويكون ليا وزن اقدر اقف عليه في حياتي العملية ها انتحر.