عرض الكلمه

وإنه اليوم اللأربعاء كان يوم حلو ويحتسب من الأيام المباركه. غريبه إزاى يوم فى شهر 2 كدا بس قشطه.

أهم ما فى اليوم المسرحيه ، إسمها الكلمه ومستوحاه من كتاب الحسين ثائرا، ماكنتش قرأت الكتاب أو حتى أعرف أى تفاصيل غير إن العيال رايحين ومارينا عزمتنى ، وبمناسبة مارينا بقى...

مارينا عزمتى قبل كدا على مسرحيه هتمثل فيها برضو بس أنا ما روحتش ، المره دى قلت لازم أروح يعنى عيب. المهم ماكنتش شايف فى أول العرض بس عرفتها من إنها أطول من فى الكاست وشعرها! ، البنت دى بتمثل تحفه ، بتعرف تندمج مع الشخصيه يمكن هى من القليلين اللى لما يتقيموا ياخدوا ما فوق ال 8 / 10 .  يكفى دور المكلومه لما مات العسكرى الأمن ، وفيه حاجه عجبتنى ماعرفش فرقت مع غيرى بس مشهد حنظله لما همد كانت بتغريه والبنات واقفين ورا بيشدوا الممثل بحبل متخيل هى الوحيده اللى كانت متزامنه مع الولد وهو بيرجع. لما جه مشهد وهم ثابتين عرفت تثبت تعبير وشها للمشهد. فيه لقطه مارينا كانت بتتحرك زى الصوفيين وكدا و وقعت منها الطرحه فبقيت بتتحرك بشعرها وأنا عمال بضحك (شبه رقص البنات الخليجى ، وإعلان شعر لما يكون مبلول وتطلعه من تحت الميه بيعملوا كدا بالظبط) .

كان فيه ولد كمان اللى لعب دور حر ، دا أكتر ولد دخل دماغى ومثل صح ومعاه الولد اللى كان قصاده عمرو بن سعد أعتقد ، وغير مارينا فيه البنت صاحبة الحسنه دى عظيمه تعابير وشها وردود فعلها وكمان حركة جسمها مع الكلام حلوين وكمان البنت اللى لعبت دور الست العجوزه.

أقوى ما فى المسرحيه دى الساوند تراكس اللى إتلعبت وكانت كمان بتشتغل صح أووى .. والدخله فى أول المسرحيه ، طان شئ مبهر جدا.

فيه طبعا شئ مهم بالنسبالى توثيقه ، البنت الريد هيد، هى شعرها غامق بس محمر يا كلاب ، و نمشها حلو على عكس ما أنا تخيلت ، بس الأزمه فى حاجتين لا داعى ذكرهم ، يكفى إنى شفت ريدهيد كيوت *هااااح*

طبعا عبدالوارث تنين إنه يخرج بعرض كدا وبأعمار أغلبها ثانوى ، بس هقتله بسبب لغته العربيه بأخطاءه الإملائيه!