تناقضات بالمعنى الحرفى

-
ممكن فى الأول تسمع سعاد ماسى  وتقرأ البوست دا أو هبه طوجى.

بعيداً عن كل حاجه , أنا شخص كلامى كتير فى حاجات تافهه , ما بتكلمش بجد نهائى , كل أمورى بتمشى بالهزار والضحك وما باخدش حاجه تخصنى بجد , مستهتر وما عنديش أولوليات .
الحمدلله عايش الحياه بشكل عشوائى خازوقى رهيب , مش محتاج تعليق حضرتك على كونى مفروض أكون جد شويه/أو أبطل دلع , مفيش طاقه للجدال فى مدى صحة منظورك الشخص فى أبعاد تكوين شخصيتى.

نحاول نكون خفيفين بحضورنا ونبطل تعليقات سخيفه مقصوده أو غير مقصوده , أعتقد فيه ما هو أهم ممكن نتكلم فيه , كإن سكارليت جوهانسون فركشت وسيرينا عندها 33 سنه وأسد فى الملعب. نتكلم إن إسم زى سيليا وسيلين أسماء تجلب البهجه .


عندك ممكن تتكلم إن الزمالك قادم بعد ماتش كسبه وترجع تكتب سنظل أوفياء بعد ما الشرطه إتعادلت معاهم. ممكن فى مرة وسط الكلام تلاقينى بقولك ما تعرفيش واحده صاحبتك ريدهيد أوبلوند؟ أو أفتح الكلام بالسؤال دا , مش معنى إنى بسأل كدا دا هو الإهتمام الوحيد فى حياتى ومكرس ليه وقتى كله بالعكس , دا الشئ اللى نقدر نعتبره طريف وبيحط جو من الجمال فى وسط الغار اللى الواحد منعزل فيه

مش مهم نشوف بعض , أنا بتعامل مع الناس كأشياء موجوده حوليا, مش مهم تعرف مالى وفيا إيه بس مطالب إنك تكون موجود وطبيعى جداً نتكلم عن حاجات عبيطه وما نقربش من الحاجات الغويطه اللى بنهرب منها , إحنا أصدقاء والطيور على أشكالها تقع وبالتالى عمرنا ما هنقرب من الحاجات دى قصاد حد , إحنا أذكى من إننا نعمل كدا قصاد حد , على الرغم من إنها حاجه غير صحيه تماماً وبتخليك تحوش وتجمع كمية طاقة سلبيه ضد الشخص وليست ليه .

لما تلاقى نفسك هتبدأ تعك فى الكلام وتخسر وجود شخص قصادك , إبعد فتره بسيطه كدا لحد ما الشحنه تقل وتبدأ تكون واعى للكلام اللى هتقوله وإرجع عاتبه أو ممكن تعمل من إسكتلندا وتاخدنى معاك نتمتع بجمال المناظر هناك سواء كانت ريدهيدز او حتى مناظر طبيعيه (أنا شخصياً حابب أشوف ريدهيدز ثم لو فضل وقت هشوف موضوع المناظر الطبيعيه , على الرغم من كونى مقتنع إن الريد هيدز منظر طبيعى خلاب لا يصح غض النظر عنه بالمره)

-----------------------------------

مدى إنبساطى بكونى ركبت اللمبه فى أوضتى وخليت اللون السماوى يرجع يظهر تانى لا يوصف يا جماعه , لازم تعرف إنك شخص كسول جداً فى أى حاجه تخصك,كفايه إنك سايب السقف من غير ما يكون لونه إسود ومنقط بالنجوم والمنظر بتاع رأس سدر . النجوم منورة فى السماء بشكل كان يخليك نفسك ما تبقاش لابس نضاره وتشوفه على الطبيعه بحركه واسعه مش محدوده بإزاز النضاره.
-----------------------------------

ما تخليش إحساس إن حد بيوحشك وبقالك فتره نفسك تشوفه يقتلك , خليك متمسك باللى إتفقت عليه بينك وبين نفسك , حتى لو فقدت الشخص دا كالشئ المقرب ليك جداً , يوماً ما هتلاقى زُهرة* تانى هو موضوع نقدر نقول إنه مستحيل وصعب جداً بس أكيد هتكون موجوده فى مكان ما على وجه الأرض دى والرساله السادسة بتوضح جزء من الموضوع دا, حرفياً فيه جزء من شخص كان موجود هنا وإحنا عارفين كويس هو مين وكان وظيفته إيه فى وسط التروس دى كلها , يمكن يكون هو الترس الأساسى والمهم فى الموضوع , هو trigger لأغلب الfunctions العطلانه حالياً , ممكن يتوجد بس هيكون مزيف أو مش بنفس الكافأه , حل مائل والحال المائل دا حاجه ما بتعمرش معانا أكتر من 22 ثانيه وبتترفض من الsystem. بمناسبة الموضوع دا ممكن نسمع سيرة الأراجوز ونركز جداً وهو بيقول " ردنى على الباب عطب روحى , جابلى ناى وزيتونه مجروحه , مر أنا يا صاحبى لو ذوقتنى , جيت أقول آه ما صدقتنى , ..... " .
ما تزعلش إنك مش لاقى نفس الشعور, مش مهم تهتم بالإهتمام المقابل , خليك كدا واحشك الفراغ دا , خليك حاسس بنقص علشان الكمال حاجه ما بنوصلش ليها .



-----------------------------------

كونى إفتكرت please بالفرنساوى كان معناها إيه بالنسبالى كان شئ معجزه , ليه ما يكونش الفرنساوى حاجه زى كدا مثلاً , يعنى الفرنساوى لغة تخليك لما تكون بتتخانق و وصل حدة الموقف لمراحل الشتيمه لا قدر الله وسب وقذف وتسمع صاحبتك/مراتك " علشان الشرقيين" بتشتمك بالفرنساوى !! عامةً مستحيل تكمل خناق حتى لو جابت سيرة الست الوالده, الموضوع هيقلب بضحك أو الرقه هتاخدك وتروحوا سوا أماكن ألطف بكتير من الجعير والزعيق فى وش بعض, هيح.

----------------------------------

رجوع ألم ركبتى تزامناً مع بداية اللعب بجد شئ مُحزن فشخ , نأمل إنها تكون وجع بسيط وهتخف بسرعه علشان كفايه عك.

-----------------------------------

المتابعه فى صمت أحد أحلى النعم , عدم القدره عن التعبير فى شكل حضارى بسيط بالكلام فى وسط نقاش بيكون سئ جداً , بس بيكون مريح فى أوقات كتيره وبيختصر عليك عناء إنك تقول الموضوع او النقطه وبعدين ندخل فى نقطة الجدال, شكراً يارب على النعمتين دول وباقى النعم أكيد

-----------------------------------

*زهرة : هى شخص موجود فى رواية محطة الرمل , يُنصح جداً بقراءة الروايه والحسره لمن فقد مثلها , وإنتظارها لمن لم يحظى بشخص مثلها فى حياته.
** كتبت التدوينه دى وجزء منها راح للفيسبوك , حسيت إنه وحشنى أكتب حاجه هناك فى حين إنى كسلت أكمل ورجعت من تحت كملتها, فيه شئ غريب بيحصل حوليا بس حواسى كلها متعطله او نقول مفيهاش باور كفايه تتوقع .

تعليقات

إرسال تعليق

المشاركات الشائعة من هذه المدونة

فقط، استمتع.

-
"لا تدري لعل الله يحدث بعد ذلك أمراً" من أكثر الأشياء عبثيه أنك لا تدري وماذا بعد، هل هناك فرج؟ هل ستسوء كل الأمور لتنهض من الركام من جديد؟ لا شئ أكيد، أنت فقط تستمر في العمل، في الكفاح، وتأمل أن كل شئ سينتهي أو "هناك احتمال آخر لتتويج مسعانا بغير الهزيمة، ما دمنا قررنا أننا لن نموت قبل أن نحاول أن نحيا" وإن غداً لناظره لقريب، لا حتمي، لا شئ يستمر، لا شئ سيدوم. هذا ينطبق على كل ما نخاف وكل ما نستمتع به من أشياء جميله. لماذا إذاً القلق؟ لماذا التفكير الزائد؟ لا شئ أكيد، ولكن العقل واحد من النعم والنقم التي لا تستطيع أن تتمالك كل ما يقوم به، بعض الأشياء تحدث دون درايه، والقليل الكثير الذي يمكنك أن تفعله أن تهدئ من روعك، أن تتذكر أن ما تريده/تخاف منه سيزول وستأتي الأيام لتثبت لك أن كل ما تفكر فيه يحتوي على كثير من المتغيرات التي لا سلطة لك عليها.
قراءة المزيد

الجنوبي - الإهداء

-
 من قراءة "وأنت السبب يابا" أدركت شيئاً لم أكن قد وضعت له أسماً، أنا أحب التواجد في وسط زحام من البشر، ولكني لا أريد منهم أن يطلبوا مني التفاعل معهم والرد عليهم. كانت هذه من صفات عم نجم، أنه يستيقظ صباحاً وفي حالةٍ نفسيه للكتابة، يفضل أن يبقى صامتاً دون توجيه الكلام إليه وانتظار الرد، أظن أن هذه من الصفات التي أمتلك ولا يقدرها أي فرد من المحيطين لي في المنزل. في جلستي الأخيرة طلبت مني طبيبتي أن أكتب لأنني لا أخرج ما يدور في حياتي إلا في الكتابة، وكان ردي عليها أنني أكتب حينما أقرأ، دون ذلك لا أجد الطاقة أو الرغبة للكتابة. وأثناء بحثي عن صفات مرضي النفسي، وجدت أنني قد أدخل في حالةٍ نفسيه، تجعلني شرهاً للقراءة وهذا ما حدث لي في فبراير، قرأت عدداً لا بأس به من الروايات ثم بعد ذلك نضبت رغبة القراءة، وكان لا بد من تحفيزي للعودة لها بشراء كتابٍ جديد، فقط عندما يحدث هذا، أحياناً استعيد رغبتي للقراءة مرة أخرى واستعارة بعض الكتب من الأصدقاء. زيارتي لبيت الصديقة لُبنى، أهدتني الجنوبي، وهي سيرة ذاتية لزوجة أمل دنقل، تعلم صديقتي كم أحب أمل، وكيف أن هذا الكتاب من الكتب التي كنت سأقتني، طل...
قراءة المزيد

الصمت كالسوس

-
الألم، هو أحد أكثر الأشياء المحفزة للكائنات الحية!. حينما نشعر بألم في جسدنا نحاول بطريقةٍ ما أن نخفف هذا الألم او أن نبحث عن اصل المشكلة ونعالجها، لكن ما أنا بصدده الآن ليس ألماً جسدياً، نعم إنه النوع الذي ﻻ تعلم من أين جاء، وﻻ كيف تتخلص منه، زائرٌ ثقيل الدم ﻻ يستحي أن يدمر كل ما يقف في طريقه لكي يستقر هو ويسيطر على جميع حواسك وتفقد القدره على الشعور بشئ سوى هو، الألم. يعتقد البعض ان كل شئٍ يمكن تداركه، أو على الأقل التخلص من ضرره، ولكن الألم النفسي ليس بهذه السهوله. لست بالمتخصص في الطب كي اسرد مدى صعوبة الأمر، ولكني أحد ضحاياه، استطيع أن اتحدث من الزاوية التي امتلك من الأمر وهي التجربه الفعليه. اعتقد أن اسوأ ما قد يمُر علىَّ في يومي هو عجزي عن التحدث عن ما امر به، سواءً كانت موجة حزن أو أحد نوبات الهلع المفاجئة الحدوث دون سابق إنذار. لا يعلم الكثير عن كيفية تحديد نوع الألم الذي يمرون به الآن، ولكني اصبحت إلى حدٍ ما ذا خبرة في مثل هذا الأمر، فحينما اتألم من جرح أحد العمليات دون حدوث أي حركه عنيفه اطمئن نفسي أن كل شئ على ما يرام، وألعن جسدي الذي ينوي أن يشن حرباً هوجاء ويعلن ...
قراءة المزيد